Chin Ramkulh, Tedim Khuapi Chung Ah SAC Ralhrang Lut Ding In Mino A Khawmhsuattu Lah-Wah-Kah Hruaitu U Moe Thu An Tlaih

Tedim Ah SAC Ralkap Tla Ding In Mino A Khawmsuattu Lah-Wah-Kah Hruaitu An Tlaih. Chin ramkulh, Tedim khuapi chung ah SAC ralhrang lut ding in mino a khawmhsuattu Lah-Wah-Kah hruaitu U Moe Thu an tlaih, tiah PDF-Zoland ṭuanvo ngeitu pakhat nih a chim.

2024, April 14 ah zing ah kum 59 tluk a simi pengkomh Lah-Wah-Kah hruaitu U Moe Thu cu mizapi ralkap pawl ralrin peeknak zeirel loin SAC ralkap lut ding in mino pawl hramhram in a khawmh lengmang hna caah PDF-Zoland nih an tlaih i phung ning in an ṭawlrel lai, tiah theih a si.

A luancia 2024, March 25 zong ah PDF-Zoland nih Tedim khuapi chung ah SAC ralkap tla ding in mino a khawmhsuattu minung 5 an tlaih cang hna, tiah theih a si. Lungmili Post

Relchap: Malaysia Ah Malsawm Khuami Ngakchia 1 Hmaikhah Pa Nih A Thah. Chin ramkulh, Hakha peng, Malsawm khuami ngakchia pakhat cu Malaysia ah Hmaikhah khuami pa 1 nih a thah, tiah theih a si.

2024, April 14 zing ah Hakha peng, Malsawm khuami Pu Biak Tha Lian le Pi Tha Tin Hnem hna i an fapa Peter Biak Ṭha Cung (kum 7) cu Malaysia ah an umnak innkhan pawng a um vemi Hmaikhah khuami pa pakhat nih a hnawng in a dih i a thi, tiah a mah he aa neihniam mi Malsawm khuami pakhat nih Lungmili Post ah a chim.

“Peter hi a nu le a upa he Malaysia ah inn hlan in um mi an si. A that tu pa hi an inn hlan nak innkhan pawng te ah inn a hlang vemi a si i Peter he hin game hna an i celh ṭi tawn. A thah dih hnu ah a upa sin ah a va kal i na nau hi aa hngilh sau ngai va zoh te hmanh tiah a chimh ta i a zaam,” tiah a chim. Lungmili Post