Mizoram ramkulh, Lawngtlai peng, Sangau khua ah nihin April 2, zanlei suimilam 3:00 hrawng ah rial tam ngai a tlak caah khuachung inn zeimawzat an rawk i, a rawk mi lak ah cozah Quaters’ le ralzaam i dornak camp hna zong an i tel.
Nihin rial tla mi a tam ngai caah khuachung hmun cheukhat ah rial aa dil i, Sangau Bazar Vengthar hna ah cun motor hmanh kal kho lo tiang in rial aa dil caah JCB nih a thianhfel hnu ceo ah an hman khawh.
Sangau Bazar i aa dil mi rial cu Pu H.Lalremruata le Pu H.Tialirha te inn ah a luang i chungkhar lei an buai manh ngai, Sangau YLA le mi cheukhat nih rial a luang mi le aa dil mi cu an thianhfelpiak hna, tualchung media nih an ṭial.
“Nihin Sangau khuachung rial a tla mi cu a ngan zong a ngan i arti tia hrawng a si, a tla mi a tam hlei ah a ngan ngai caah khuachung lei inn a cungcih a rawk mi a tam. Ralzaam umnak camp zong an rawk ve i, a tam-u cu canphio cih lo mi a si caah a awng dih ngawt, canphio inn aa cih mi inn hnih zong a awng ve ṭhiam, kan cinthlak mi thlai tete zong a rawk dih,” tiah Sangau khua ah ralzaam in aa dor mi pakhat nih The Chin Post ah a chim.
Sangau khua inn cungcih a rawk mi zat hi atu dirhmun ah zeizat a si fiang in theih khawh a si rih lo nain inn tam ngai a rawh caah khuasak cawlcanghnak a buai ngai. Sangau MDC le MLA nih cozah lei ṭuanvo ngeitu zong pehtlaihnak an tuah colh hna i rianrang in bawmhchanhnak kalpi zau a si lai, tiah Pu K. Hre Kung, MDC nih mizapi thinphang thlalau tuk i um lo ding in a thanh hna.
Rianrang deuh in bawmhchanhnak kalpi ding ah Lawngtlai lei in Silpoulin phurh lio a si, tiah YLA, Sub-Headquarters Sangau nih thawngthanhnak an tuah ve.
Leave a Reply