Mongmit Pawng Um Mai-sat-kaung Sakhaan KIA Nih An Lak>>>

Kachin ram, Mongmit peng, Mai-sat-kaung sakhaan cu April 3 zinglei ah tlamtling tein an lak khawh i hriam cheukhat zong an lak khawh tiah KIA lei thawngzamh nih an langhter.

April 2 ah Kyauk sakhaan tlamtling tein an lak khawh cang nain Mai-sat-kaung sakhaan cu April 3 zinglei lawng ah tlamtling tein an lak khawh hi a si.

Atulio Mongmit peng chung ah, SAC ralkap sakhaan cheukhat lawng an tang cang i a rauh hlan ah Mongmit khuachung ah kahdohnak a fak kho tiah KIA lei thawngzamh nih an langhter.

 

 

Magway ramṭhen, Pakokku khuapi in Chinram lei ah a kai mi SAC ralkap motor 7 cu lampi ah rak bawh in kan kah i a ningpi in kan laak dih hnu ah kan khangh, tiah PDF ṭangṭi phu nih an thanh.

A luancia March 23 ni thawk in Pakokku khuapi, no.101 Khah-Mah-Yah General Headquaters in a chuak mi SAC ralkap motor 100 leng cu PDF ṭangṭi phu nih nifatin in an kah i, a luancia April 2 ni ah Kamma khuapi a phan mi motor 7 zong kan kah hna, tiah PDF ṭangṭi phu nih cun an thanh.

“Vengtu a tlawm i hnu ah a kal mi riahcaw phur motor pawl cu naih tein kan kah hna, meter 50 hrawng lawng kan i hlat i motor chung um mi SAC ralkap pawl cu an zaam dih hna,” tiah PDF ṭangṭi phu in ṭuanvo ngei Teza nih a chim.

PDF ṭangṭi phu nih an kah mi motor 7 chung ah cun Petrol, Diesel, facang le Electric thilri tam ngai a um i PDF ṭangṭi phu nih an laak hnu ah motor cu a zate in an khangh. Ralkap thazaang 700 hrawng nih an zulh mi motor cu Kamma khuapi nitlaklei meng 1 tluk a hlatnak ah an i hreng, tiah theih a si.

Cu SAC motor aa zul mi pawl cu a luancia March 27 ni ah Kamma khuapi pawng ah PDF ṭangṭi phu nih an rak kah, cu lio zong ah motor pakhat an rak hrawh khawh i SAC ralkap nih Kamma khuapi nitlaklei sang an khangh ve caah inn 50 leng a ciamh kong Kamma PDF in ṭuanvo ngei pakhat nih a chim.

Cu kahdohnak ah cun NUG kuttang PDF Battalion, tualchung hriamtlai phu(LDF) le Pah-Kah-Phah phu an ṭangṭi, tiah theih a si.

Nihin April 5 ah SAC ralkap motor pawl cu Kamma khuapi nitlaklei Pauk peng, Yaepyar khua pawng an phan i Pauk khuapi an lonh ahcun Kyaukhtu khuapi in Chinram thlanglei le Yaw hmunram an lut kho.