Ngaihchia Tuk Hringhran Ko: Uico Ralhrang Nih Khua Mi Pa 5 An Thah Hna Hnu Ah Inn 400 Leng An Khangh Chap

SAC Ralkap Nih Shwebo Peng, Shartaw Khua Mi 5 An Thah Hna I Inn 400 Leng An Khangh. Sagaing ramṭhen, Shwebo peng, Shartaw khua mi 5 cu SAC ralkap nih an thah hna i inn 400 leng an khangh.

April 6 ni ah SAC ralkap cu Shwebo peng, Shartaw khua ah rallam sial in an lut i khua mi U Win Khin, U Ung Maung, U Naung Naung Htun, U Soe Aung le Daw Nyunt Yin cu an tlaih hna i an thah hna hnu ah inn 400 leng an khangh, tiah theih a si.

“Thah a tong mi hi minung 5 an si i kum 80 cung le kum 90 cung a zaam kho lo mi tar pahnih cu meikhangh in an thah hna, a zeng mi pakhat telh in minung pathum cu meithal in an kah hna hnu ah tikhur ah an thlak hna, khuapi ning ti tluk in inn an khangh i inn tlawmte lawng a kaang lo mi a si,” tualchung mi pakhat nih a chim.

“Cu pin ah April 5 ni ah Magway ramṭhen, Pauk peng, Shwelan khua ah SAC ralkap pawl rallam sial in an lut i inn 20 leng an khangh, tualchung mi cu a himnak hmun kawl in an zaam dih,” tiah tualchung mi pakhat nih cun a chim. The Chin Post

Thawngpang dang: Mon Ram Hriamtlai Phu Hna Cu Kahdohnak Ah Ṭangṭi Ding In An Lung A Tling. Mon ramkulh, hriamtlai phu hna simi Mon State Federal Council (MSFC), Mon State Revolution Force (MSRF) le Mon State Defense Force (MSDF) hna cu SAC ralhrang uknak doh in ramkhel lei ah i fonh ding in kan lungtling, tiah 2024, April 7 ah an thanh.

“Mon ramkulh hriamtlai phu hna i fonh in kahdohnak hna cu hmunkhat ah kalpi a herh ruang ah atu bantuk in lungtlinnak kan ngeih hi a si” tiah Mon State Defense Force (MSDF) ukhruainak committee chairman Nai Mon Sai nih a chim.

Ramkhel lei zong ah Bu khat kan si a herh, a dang ramkulh hna he kan tahchunh ahcun hi dirhmun hi an phan kho rih lo, ramkhel kong ah aa dang mi phu hna cu hmunkhat ah an i funtom ti mi a um rih lo, kan zapi tein a ṭangṭi mi phu kan si a herh, tiah a chim chap.

MSRF le MSDF hna cu SAC ralhrang uknak le a nawlngeihnak pawl a hrambongh tiang in kahdohnak kan tuah lai i nawlngeihnak a ngei mi Mon ramkulh sersiam khawh tiang in kahdohnak ah a ṭangṭi mi phu kan si lai, tiah an thanh. Lungmili Post