Good News :Lwegel Khuapi Cu SAC An Um Lonak Hmun A Si Tiah KIA Nih An Thanh

Lwegel Khuapi Cu SAC An Um Lonak Hmun A Si Tiah KIA Nih An Thanh.Kachin ramkulh, Momauk peng, China-Myanmar ramri Lwegel khuapi chung ah a taang mi Khah-Lah-Yah 142 SAC ralkap le Non-CDM vialte cu China ram ah an zaam dih caah Lwegel khuapi cu SAC an um ti lonak hmun a si i KIA nih khuapi a ningpi in an laak kong phungning tein an thanh.

“Lwegel khuapi ah a um mi SAC ralkap le Non-CDM vialte cu China nih a cohlan hna i an zaam dih caah Lwegel khuapi cu SAC an um ti lonak hmun a si i KIA kuttang ah a um dih cang, nizan April 8, zan suimilam 10:00 cun Lwegel khuapi chung ah SAC ralkap le Non-CDM pakhat hmanh an um ti lo,” tiah KIA thawng laaknak hrampi nih an chim.

A luancia March 27 ni thawk in Bhamo–Lwegel lampi cung um SAC ralkap sakhan vialte cu KIA le ṭangṭi phu nih an rak kah i April 1 ah a donghnak bik a taang mi Seinlong Byuha sakhan an rak laak khawh, April 2 ni ah Lwegel khuapi cu a ningpi in an laak i nizan April 8 zinglei ah Lwegel khuapi chung Khah-Lah-Yah 142 sakhan ah KIA nih thianhfelnak an tuah, tiah theih a si.

Rrrak Rel Chih HrimHrim :Thantlang Peng, Vomkua Khua Ah Chungtlik Pawfah Rai A Tlung I A Zaw Mi An Tam.
Chinram, Thantlang peng, Bual tlang, Vomkua khua ah chungtlik pawfah rai a tlung i a zaw mi an tam ngai, tiah theih a si.

A luancia April 7 ni thawk in Vomkua khuachung ah chungtlik le pawfah in a zaw mi an karh ngai caah Tikir siizung ah kalpi in thlopbul cuahmah mi zong an um i a cheu cu siizung panh kho lo in mahte in aa zohkhenh mi zong an um, tiah theih a si.

Hi kong he pehtlai in Vomkua khua mi pakhat nih cun, “Apri 7 ni, zarhpi ni thawk khan khuachung ah chungtlik le pawfah zawtrai a tlung i khua mi a zaw mi an tam ngaingai, a cheu cu Tikir siizung ah an kalpi hna, nihin zong ah kalpi cuahmah mi an um, Tikir siizung cu khua mi dam lo lawngte an khat ko. A cheu cu chungkhar ning in a zaw mi hna an um i kan lungre a thei ngaingai, a cheu cu siizung panh kho lo in mahte aa thlop lio mi zong an um,” tiah The Chin Post ah a chim.

“Kum dang ah cun a khua ningpi ti tluk in atu bantuk zawtrai ngaingai cu kan tong bal lo. Vomkua hi cu a linhnak hmunram a si i kan dinti ruang hna ah hin a si hnga maw ti kan ruat ngai, ti kan thah mi zong chun ah cun lum vuapvap in an um dih i, a linh tuk caah atu bantukin rai a tamnak zong hi a si kho men, siizung ah kalpi cang mi le kalpi cuahmah mi an um caah mizaw zat hi fiang in hngalh a si rih lo,” tiah Vomkua khua mi pakhat nih cun a chim.Credit : The Chin Post