SAC Ralkap Nih Myaungsone Le Cicai Khua Sianginn Ah Drone In Bomb An Thlah.Sagaing ramṭhen, Kalay peng, Myaungsone le Cicai khua sianginn ah SAC ralkap nih Drone in bomb an thlak i sianginn a rawk, tiah theih a si.
Nizan April 9, zanlei suimilam 4:00 hrawng ah SAC ralkap nih Myaungsone khua sianginn ah Drone in bomb lung hnih an thlak caah sianginn cungcih le a vampang pawl an rawk, tiah theih a si.Cu bantuk ṭhiamṭhiam in Myaungsone thlanglei Cicai khua sianginn zong Drone in bomb lung khat an thlak caah sianginn vampang pawl an rawk.
Cu kong he pehtlai in tualchung hriamtlai phu chungtel pakhat nih cun, “April 8 ni ah Drone 10 hrawng a phur mi motor pakhat Myohla khuachung ah a lut i khua kip ah an i chawk, timh ciammam tein umnak inn ah Drone in bomb an thlak i nizan April 9 ah Myaungsone le Cicai khua sianginn ah Drone in bomb an thlak, aa hliam mi belte cu an um lo,” tiah a chim.
Nihin April 10 ah SAC ralkap pawl cu Kalaymyo sehzung ah ralkap thazaang chap in motor pahnih he Tedim le Falam lei ah a kal mi motor pawl cu tangka an hal hna i, an lunghrinh mi an tlaih hna, tiah theih a si.
Rak Rel Chih HrimHrim :CDF-Matupi Brigade 1 Cu Chin Hriamtlai Phu Unau Sin Ah An I Fonh.Chinram thlanglei, Matupi peng ah hrambunh mi CDF-Matupi cu nihin April 10 in an dirhnak kum 3 a tling i, cu lawmhpinak cathanh an chuah mi ah cun CDF-Matupi Brigade 1 nih Chin hriamtlai phu unau sin ah an i fonh kong an thanh.
CDF-Matupi dirh kum 3 tlin ni, nihin April 10 thawk in Chinram chung kahdohnak, Federal Democracy ramkomh sernak le tlukruannak kong ah CDF-Matupi Brigade 1 cu Chin hriamtlai phu unau he ṭangṭi in dohthlennak kan kalpi lai i, ramchung ramleng ah a um mi dohthlennak ah thazaang a chuahtu vialte nih CDF-Matupi Brigade 1 cu hnakkar tenh in rak kan bawm ṭhan rih ko u, tiah CDF-Matupi kum 3 tlin lawmhpinak cathanh an chuah mi ah an langhter chih.
Good News :KIA Nih An Laak Mi Lwegel Khuapi Um SAC Ralkap Sakhan Ah Tangka Kyats Sing Sangkhat Hrawng An Laak.Kachin ramkulh, Momauk peng, China–Myanmar ramri, Lwegel khuapi um Khah-Lah-Yah 142 SAC ralkap sakhan chung ah tangka Kyats sing sangkhat an laak kong KIA thawng laaknak hrampi nih an thanh.
Nizan April 9 ah Khah-Lah-Yah 142 SAC ralkap sakhan chung um SAC ralkap le Non-CDM pawl cu sakhan chuahtak in China ram lei an zaam dih hnu ah KIA nih hmunram thianhfelnak an tuah i zaamtak mi tangka Kyats sing sangkhat an hmuh, tiah theih a si.
“Tangka hi Kyats sing sangkhat hrawng a si lai, Bank ah chiah mi tangka pawl laak in an chiah mi a si ṭheo lai, SAC ralkap thilri chiahnak innpi chung ah kan hmuh,” tiah KIA lei nih an chim.Nizan April 9 ni ah Kachin ramkulh, Momauk peng, China-Myanmar ramri Lwegel khuapi chung ah a taang mi Khah-Lah-Yah 142 SAC ralkap le Non-CDM vialte cu China ram ah an zaam dih caah Lwegel khuapi cu SAC ralkap an um ti lonak khuapi a si tiah KIA nih phungning tein an thanh.Credit ; The Chin Post
Leave a Reply