Myanmar Ram Ni A Linh Tuk Ruang Ah Ruahlopi In A Tlu I Nunnak Liam Mi

Myanmar Ram Ni A Linh Tuk Ruang Ah Ruahlopi In A Tlu I Nunnak Liam Mi An Um. Myanmar ramchung, Yangon le Mandalay khuapi hna ah ni a linh tuk ruang ah ruahlopi in lamcung ah nunnak liam mi minung 4 an si cang, tiah chiatṭhat zohkhenhtu phu hna nih an chim.

2024, April 9 nikhat chung lawng ah Insein peng, Bayintnaung lamcung ah kum 40 leng a si mi pa 1 cu ruahlopi in a tlu i a nunnak a liam. South Okkalapa, Parami lamcung zong ah phungki 1 nunnak a liam ve, tiah an chim.

Cu bantuk ṭhiam in April 9 ah Mandalay khuapi um chawdawrnak hmun Zaycho ah thil a caw lio mi nu 1 cu ni a linh tuk ruang ah a tlu i sii-inn an kalpi lio ah a nunnak a liam.

A luancia April 7 zong ah Yangon khuapi, Shwedagon pura pawng ah kum 50 leng a si mi pa 1 cu ni a linh tuk ruang ah ruahlopi in lamcung ah a tlu, tiah chiatṭhat zohkhenhtu phu hna nihcun an chim.

Ruahlopi in a tlu sual mi hna cu nilin a fah ruang ah an thluak thahri a cat i an lung a mih caah a si, tiah kan theih. SAC ralhrang khuacaan zohnak zung zong nih 2024 kum hi kum dang nakin nilin a faak lai i April thla le May thla chung ah a linh zual lai, tiah a langhter ve. Lungmili Post