KNLA Le Ṭangṭi Phu Nih Myawaddy Khuapi An Laak >>>>>

Karen ramkulh, Myawaddy khuapi ah hrambunh mi Khah-Lah-Yah 275 sakhan telh in SAC ralkap sakhan vialte KNLA ṭangṭi phu nih an laak dih hnu ah Myawaddy khuapi cu a ningpi in an laak kong KNU nih nihin zinglei ah phungning tein an thanh.

KNLA hruainak in KNDO le ṭangṭi phu nih Myawaddy khuapi ah a donghnak bik a taang mi Khah-Lah-Yah 275 sakhan a um mi SAC ralkap pawl cu hriamnam chia ding in an ti ko hna nain an chiah duh lo caah April 8 ni ah an kah hna i nihin April 11, zing suimilam 4:20 ah sakhan cu an laak, cu sakhan laak a si hnu ah Myawaddy khuapi cu a ningpi in laak a si cang kong KNU nih an thanh. Cu sakhan kahdohnak ah cun KNLA ṭangṭi phu nih hriamnam tam ngai zong an laak.

KNLA ṭangṭi phu nih Myawaddy khuapi a ningpi in an laak hnu suimilam 11:00 hrawng ah SAC ralkap nih raltuknak vanlawng in pound 500 tluk a rit mi bomb cu Myawaddy khua kam ah an thlak. Khah-Lah-Yah 275 sakhan um SAC ralkap 200 hrawng cu No.2 Chitkyiyee hlei cung ah an i dor i hriamnam he Thailand ram ah zaam an i tim nain atu tiang ah zaamnak nawl an pe rih hna lo, tiah theih a si.

 News Dang>>>>

SAC Ralkap Nih Tlangzawl Khua Mi Cu Thil An Phurhter Hna I Pakhat An Thah>>>>>>>>

Sagaing ramṭhen, Kalay peng, Tahan–Letpanchaung lampi chung ah a um mi Tlangzawl khua mi cu SAC ralkap nih thil an phurhter hna i, thil a phur ve mi Pu Tluang Tin Zam(kum 44) cu SAC ralkap nih a ṭaang ah meithal in voi 4 an kah i a nunnak a liam, tiah theih a si.

A luancia April 5 ni ah Vaphai khua ah a um mi tualchung hriamtlai phu kap ding in SAC ralkap pawl cu rallam an sial i lampi ah an hmuh mi tualchung mi paoh an tlaih hna i Tlangzawl khua inn hnih ah an hren hna. Cu ni chunhnu suimilam 2:00 hrawng ah Tahan lei ah an thlah ṭhan hna nain Tlangzawl khua mi pa 5 tu cu thil phur ding ah an kalpi hna i, lung zawtnak a ngei mi Pu Tluang Tin Zam cu a ṭih tuk i zaam aa timh caah SAC ralkap pakhat nih an kah i a hmun ah a nunnak a liam colh, a dang minung 4 tu cu an thlah ṭhan hna, tiah theih a si.

April 6 ni ah thah a tong mi Pu Tluang Tin Zam ruak cu khua mi nih an kawl i an hmuh nain Vaphai khua ah umhmun a khuar mi SAC ralkap pawl nih an kah hna caah a ruak cu a rannak in Duwinchaung thlanmual ah an phum colh, tiah theih a si.