Min Aung Hlaing Thlak Timh Ruang ah Ralbawi Cheukhat Tlaih an Tong.SAC Chairman Min Aung Hlaing ṭhumhthlak ding in rian an ṭuan tiah puh mi ralbawi pahnih le USDP Party cungtel upa pakhat cu SAC ralkap nih an tlaih hna, tiah theih a si.
Tlaih a tong mi hna cu U Thein Sein chan ah Myanmar ram cinthlak lei vuanci a rak ṭuan mi U Myint Hlaing, Min Aung Hlaing ruahnak petu Lieutenant General Nyo Saw le Lieutenant General Aung Soe an si.
U Myint Hlaing cu April 9 ah khan an tlaih i ni hnih a rauh hnu April 11, zaan sml. 9:00 hrawng ah Lieutenant General Nyo Saw le Lieutenant General Aung Soe zong an tlaih ve hna.Min Aung Hlaing thlak ding in an i zuam ruang ah an tlaih hna tiah thawngpang a leng ngaingai nain an pathum ning in ziknawh eihmuarnak case in tazacuai an si.Nihin April 12 zong ah Naypyidaw khuapi chung lamṭe le luhchuahnak kip ah SAC ralkap nih runvennak chah ngai in a tuah i ralbawi dangdang tlaih an timh mi hna an um rih kho, tiah an zumh.
Rak Rel Chih :SAC vanlawng nih ramri an rak lonh ahcun kah ding in Thailand Runvennak Minister nih nawl a chuah.Thailand ram chung ah a rak lut mi Myanmar SAC ralkap vanlawng pawl cu minutes 5 chung ah kah ding in Thailand Runvennak Minister Suthin Klangsaeng nih Cawnni li ni ah nawl a pek hna, tiah Khaosod English media nih a tial.
Thailand ramri Myanmar ram chung kahdohnak a fah lio ah atu bantuk in Runvennak Minister nih nawlpeknak ca min a thut hi a si. Thailand ramri ah a um i chawlehnak ah a biapi ngai mi Myawaddy khua cu KNU le ṭangṭi phu hna nih an tuk i SAC ralkap pawl an zaam. Myawaddy khua in khat lei raal Thailand ram chung ah a um mi Mae Sot khua ah Thailand ralkap pawl cu hriamtling he an phan tiah theih a si.
Myawaddy khuapi an sungh lan lo nakding ah SAC nih vanlawng zong a hman chin lengmang khawh tiah an chim.Karen ramkulh, Myawaddy khua ah a hnu bik a taang mi Kha La Yah – 275 battalion cu April 11, zinglei sml 4:20 ah kan laak khawh i, hriamnam tampi zong kan laak tiah KNU nih a thanh.
A Poi Tuk Ee :Kachin ramkulh ah RC Father pakhat Missa raithawinak tuah lio ah meithal in an kah.Kachin ramkulh, Mohnyin Catholic Biakinn in Rev. Fr. Paul Khui Shane Om cu April 12, zinglei Missa raithawinak an tuah lio ah aho ti hngalh lo mi pahnih nih meithal in an kah tiah theih a si.
“April 12, zinglei sml. 7:00 hrawng ah a hmai aa hup mi minung pahnih nih meithal in an rak kah,” tiah Catholic Youth cahmai nih a tial.Rev. Fr. Paul Khui Shane Om cu meithal zun nga in an kah i zun thum nih a khen caah sii-inn ah an thlop cuahmah tiah theih a si. A kaptu ahodah an si ti mi tu cu hngalh an si rih lo.Rev. Fr. Paul Khui Shane Om cu kum 40 a si i Chin miphun, Mindat peng mi a si tiah theih a si.Credit : The Hakha Post
Leave a Reply