Karenni ram, Hpasaung khuapi ah raldoh bawm ding in a kal mi SAC ralkap hna cu tualchung hriamtlai phufonh nih an rak kah hna i Commander le Lieutenant General telh in minung 58 an tlaih hna, tiah ṭuanvo ngeitu pakhat nih Khit Thit Media ah a chim.
April 11 zing suimilam 4 hrawng ah Bawlakhe in Hpasaung lei ah SAC ralkap thazaang 100 leng cu an hawile bawm ding in a kal i Karenni hriamtlai phufonh nih hin lampi ah an kah hna. Commander pakhat le Lieutenant General telh in ralkap 58 an tlaih mi hna lawng nungdam in an um i a dang cu an zate’n an thi dih, tiah theih a si.
“SAC ralkap tlaih mi lak ah hin hliamhma a pu mi zong an um i kan ralkap pawl nih an thlop cuahmah hna. Kanmah lei hliamtuar an um le um lo cu kan thei kho rih lo” tiah rianngeitu pakhat nih Khit Thit Media sin ah a chim.
Hpasaung ah umhmun a khuar mi SAC ralkap pawl le Karenni hriamtlai phufonh kar an i kahnak hi thla 2 hrawng a si cang i SAC lei nih vanlawng a hman ruang ah khuachung zatuak sawmriat(80%) hrawng cu a kaang dih, tiah theih a si.
Sittwe Khuapi I India Consulate Zung Rianṭuan Pawl Cu Yangon Ah An Ṭhialter Hna>>>>>
Myanmar ram dirhmun a chiat chin lengmang ruang ah India cozah nih Rakhine ramkulh khualipi, Sittwe khuapi ah a um mi Myanmar Consulate zung rianṭuan pawl cu Yangon ah ṭhialter an si kong India Ministry of External Affairs in chimnak nawlngei Randhir Jaiswal nih nizan April 12 ah a chim.
India cozah nih Myanmar ram dirhmun a zoh peng i a hlei in Rakhine ramkulh dirhmun cu ṭha tein a ngiat kong le Mandalay i India consulate zung nih pehzulh in a ngiatthlai kong Randhir Jaiswal nih cun a chim chap.
“Myanmar ram dirhmun cu bei maw bei lo a si i a fiang lo mi le dirhmun chia ngaiin a um lio a si caah Myanmar ram ah a tlawng mi India ram mi zong nih himnak ding ca ah ser mi zulhphung tete zulh khawh cio i zuam u,” tiah a chim.
India cozah nih a ram mi hna humhim ding le a ram mi an him khawh nakhnga a herh mi paoh a tuah kong Randhir Jaiswal nih cun a chim.
Leave a Reply