Leicung hmunkip um Chinmi hna nih ruahsual lo dingmi. CNF/A cu naiciakua cu ral an tuk rih lo caah lungdong in maw um lai u cih, minung nih plan ngeih le ser a hau ve, minung cu i dinh caan zong ser hau ve, seh(machine) hmanh aa din tawn ko.KIA le AA pawl zong kha tu lelek in ral an rak tu lo,a kum kum in an i sersiam hnuah vawikhat cawlah vukvek tiah an cawl i, ram an laak thluahmahnak zong aa tel .
Cucaah CNF/A raltuk leiah an vun daihmi ah maw thachiat in tangka thawhnak thazaang der ter lo ding,heh tiah thawh le pek chinchin ding caantah kan dir tihi philh lo ding.CNF/A a vun dai chung i Chinram a vun daidup kho hih!! CNF/A nih timhtuahnak nganpi angeih ko,mah ahcun Chin mipi nih hnulei in dirkamh tthup ve kha kan rian a si ko.
CNA le CDFs hna nih hin anmah caah ral an tu lo,Chin mipi zalonnak le Chinram damnak ding caah ral an tu tikha mipi nih a thar in fian lengmang aherh. Atu cu ralhrang camp fatete a um tilo,khuapi tukte ding si caah tuan deuh lio btk khan va tuk lelek ding phun siti lo,timh ciamman tein itimhtuah a herh ve tikha a thar in ifiang tthan ko hna usih.Crd:Salai William HC
Sagaing ramṭhen, Kalaymyo chaklei ah SAC ralkap nih phone line le Internet line an phih, tiah theih a si.
A luancia April 4 zanlei thawk in nihin April 13 tiang, ni 9 chung cu SAC ralkap nih Kalaymyo chaklei ah phone line le Internet line an phih caah Internet line hmang ding in a cheu cu thingkung cung ah an kai hna, tiah tualchung mi nih an chim.
“Phone line a rawh dih ruang ah SAC ralkap khoika an phanh tibantuk zong theih khawh a si ti lo. A hlan ah cun pakhat le pakhat thawng kan rak i thanh tawn nain atu ah cun phone line an phih dih i zan ih hmanh ah thinthi in i hngilh ngam a si lo,” tiah tualchung mi pakhat nih cun a chim.
Kalaymyo chaklei ah cun line a tlau dih ruang ah pehtlaihnak a har i tualchung mi har an tong hna, line hman duh ahcun khua leng ramlak thingkung cung lawng in line an hmang kho hna, tiah theih a si.
“SAC nih hramhram in thilsual an tuah mi thuhnawh duh ruang le rallam sial in an cawlcanghnak pawl thei kho hna hlah seh tiin atu bantukin phone line le Internet line an phih dihnak a si,” tiah tualchung hriamtlai phu nih an chim.
Sagaing ramṭhen, Kalay Peng chaklei Chin mi tampi an umnak Pyinkhonlay khua Inn 219 cu SAC ralkap nih an kangh, tiah tualchung mi nih an chim.
SAC ralkap pawl cu Pyinkhonlay khua ah nizaan April 12 ah khan rallam sial in an lut i khuachung mizapi umnak inn pawl cu an khangh hna. Pyinkhonlay khua cu Inn 328 a um i cu chung ah Inn 109 lawng a him, tiah theih a si..
Kalaymyo chaklei in Mawsi khualei ah rallam sial in a kal mi SAC ralkap pawl nih cun duhpoh in hriamngan an kah i Pyinkhonlay khua cu an khangh tiah tualchung mi nih an chim.
Kalaymyo chung ah SAC ralkap le mipi ralkap kar kahdohnak a fah caah tualchung mi a thi mi an tam pinah innlo a rawk mi zong an tam cang i Kalay um tualchung mi hna cu a himnak hmun kawl in an zaam hna, tiah theih a si.
Karenni ramkulh, Hpasawng peng ah kahdoh bawm ding in a kal mi SAC ralkap pawl cu Karenni ṭangṭi phu nih an kah hna i minung 53 an thih pinah Battalion Commander pakhat le Second Battalion Commander pakhat telh in SAC ralkap 56 an tlaih hna kong Karenni Army(KA) in ṭuanvo ngei pakhat nih a chim.
“April 11, zinglei suimilam 7:00 in zanlei suimilam 5:00 tiang i kahdohnak ah SAC ralkap 56 kan tlaih hna. Cu chung ah Battalion Commander, Second Battalion Commander, Company Commander le ralbawi dang zong an i tel, a thi mi 53 an si i tlaih mi 56, an zate 109 an si,” tiah KA Adjutant General Colonel Phone Naing nih a chim.
Hi kong he pehtlai in SAC chimnak nawlngei Zaw Min Tun cu April 12 ni ah RFA nih phone an pehtlaih nain zeihmanh chim duh lo in phone a thah kong RFA nih an langhter chih.
“Hpasawng khuapi ah SAC ralkap Battalion 134 le Battalion 135 an um nain aa hliam mi an tam caah kahdoh bawm ding in a kal mi pawl cu Karenni ṭangṭi phu nih an kah hna. Hpasawng khuapi cu a ningpi ti tluk in Karenni ṭangṭi phu nih an uk cang,” tiah Colonel Phone Naing nih a chim.
Karenni hriamtlai ṭangṭi phu nih Hpasawng khuapi laak ding in thla hnih hrawng kahdohnak an kalpi cang i, SAC ralkap zong nih vanlawng in kahdohnak tuah in bomb an thlak caah inn a kaang mi a tam i tualchung mi thi le hliamtuar an um ve.
KNDF nih a luancia March 23 ni i an thanh mi ah Karenni ṭangṭi phu nih Hpasawng peng i kahdohnak ah SAC ralkap sakhan 9 an laak cang, tiah an langhter. Hpasawng khuapi ah milu 5,000 hrawng an um nain kahdohnak a fah ruang ah tualchung mi cu a himnak hmun kawl in ral an zaam hna, tiah tualchung mi nih an chim.
Leave a Reply