Malaysia ah Chin Ngakchia Kum 7 Mi Cu Chinmi Pa Pakhat Nih A Thah.Malaysia, Kuala Lumpur ah nizaan April 14 zanlei suimilam 3 hrawng ah Chinmi ngakchia kum 7 mi cu an umnak innpa ah a um ve mi Chin pa pakhat nih a thah, tiah theih a si.
Thah a tong mi ngakchia hi Chinram, Hakha peng Malsawm khua mi Pi Ṭha Tin Hnem fapa Peter Biak Ṭha Cung a si i, inn(floor) pakhat ah an um ṭipi mi Chinpa pakhat, Hmaikhah khua mi Hrang Tin Thang(21) nih a thah, tiah theih a si.
“Pi Ṭha Tin Hnem te nih an tlaih mi inn floor cu i bawm in an hlang ṭi hna i, lainawngtu nih hin inn hlan man a pek bal hna lo caah Peter cu a nu nih inn man a va halter lio ah a hngawng ah reh in a thah. Lainawngtu hi a zaam colh i Malaysia palik nih an kawl cuahmah lio,” tiah Kuala Lumpur um mi pakhat nih The Chin Post ah a chim.Peter Biak Ṭha Cung hi amah hringtu a nu le a upa kum 12 mi hrawng he khua an sa ṭi hna, tiah theih a si.
Thawngpang Dang Rak Rel Chih :SAC Tawlrelnak In Hakha Khuapi Ah Tingyan An Hmang.Chinram, Hakha khualipi certual chung ah April 13 ni in SAC ralkap le an chungkhar minung 100 leng cu Tingyan an hmang, tiah theih a si.Cu Tingyan lawmhnak ah cun SAC nih Chinram chung ah rian an khinh mi Chief Minister Dr. Vung Sun Thang telh in Ministers, cozah rianṭuan pawl le nitlak-chaklei Headquaters in Second Command Commander a si mi Brigadier General Naing Win Aung an i tel, tiah theih a si.
“Hakha khuapi Tingyan lawmhnak ah cun SAC kuttang rianṭuantu upa pawl cu an tling dih i anmah le anmah ti an i toih hna, SAC ralkap le an chungkhar dihlak ah minung 100 hrawng an si lai,” tiah tualchung mi pakhat nih a chim.
“Cu bantuk ṭhiamṭhiam in Mindat khuapi zong ah SAC ralkap le palik pawl nih Mindat bazarpi hmai ah Tingyan hmannak ding donhhlei an sak i April 13 ni in Tingyan hman an thawk ve, tualchung mi a chawk mi zong ti an toih len hna, SAC ralkap le palik nih an pawng in humhimnak an laakpiak hna,” tiah Mindat khuapi um tualchung mi pakhat nih a chim.Chinram thlanglei, Paletwa peng khuate zong ah Rakhine ralkap AA hruainak in Tingyan an hmang ve, tiah tualchung mi nih an chim.Credit : The Chin post
Leave a Reply