SAC Nih Thongtla 3,303 Chuah Hna Lai >>>>>>>>>>>

Kawl titoih puai(Thingyan) a dih in a nikhatnak nihin April 17 ah thongtla 3,303 kan chuah hna lai, tiah SAC nih an thanh.

“A liamcia caan i an chuah mi hna ah khan ramkhel thongtla an tlawm i atutan zong ramdang nih zeitin an kan hmuh ti biapi ah a chiah lo caah ramkhel thongtla chuah ding mi an tlawm kho” tiah thongtla zohkhentu phu in ṭuanvongei U Thaih Tun U nih Myanmar Now ah a chim.

Ramkhel thongtla pawl zohkhenhtu phu(AAPP) cazin ning ah 2021 Febuary 1 hnu in SAC dohkalhtu minung 26,524 an tlaih cang hna i cu chung ah minung 20,351 cu nihin tiang an thlah rih hna lo. AAPP cazin ning in minung 5,800 hrawng cu ṭha tein a luatmi an si cang nain 6% lawng an si rih.

Mizoram ramri Lungbun le Tipi kar ah motor aa let i pakhat a thi, pakua nak tlawm lo hma an pu>>>>>>>>>

April 13 zanelei sml. 5:00 hrawng ah Mizoram ram le Chinram ramri, Saiha District, Lungbun le Tipi kar chuk zuan ah pickup motor aa let i minung pakhat a thi, pakua nak tlawm lo hma an pu tiah theih a si.

A let mi motor cu Mizoram, Saiha khua in Thantlang peng, Vuangtu khua lei ah a kal mi a si i minung 17 nih an i cit. Lungbun le Tipi kar chuk zuan ah aa let i Vuangtu khuami Pu Mang Cung a nunnak a liam tiah kan theih.

“Lungbun le Tipi kar chuk zuan ah a si. Motor brake a that lo ruang ah aa let i pakhat a thi. Hma an pu pah dih ko nain faak deuh in aa khawng mi hi pakua hrawng a si,” tiah Vuangtu khuami pakhat nih a chim.

Motor lehnak in hma a pu mi hna cu Saiha sii-inn ah an thlop hna i a zual deuh mi pathum cu Aizawl ah an lanhpi hna. A nunnak a liam mi Pu Mang Cung ruak cu April 14 ah Vuangtu khua an an vui tiah theih a si.

Kalaywa peng in palek bokhat pakhat CDF-KKG sin ah hriamnam he aa ap>>>>>>>>>>

Sagaing ramthen, Kalaywa peng in bokhat rank a si mi palek pakhat cu hriamnam kuanzen he a rak i ap tiah CDF-KKG nih nihin April 15 ah a thanh.

Palek bokhat pa nih cun BA 94 meithal zun 1, kuan bawm 2, zenthong 200, pistol zun 1 le pistol zenthong 12 a rak i ken i CDF-KKG sin ah a rak i ap tiah theih a si.

Hriamnam kuanzen he a rak i ap mi palek pa cu laksawng tangka Kyats sing 50 an pek hnu ah himnak hmun ah kan thlah cang tiah CDF-KKG nih thawng an thanh.