Hramhram in nawlngeihnak a latu SAC ralkap uknak ṭha lo dohkalh in a cawlcang mi CDM rianṭuantu pawl cu ramleng kalnak vanlawng Ticket pek lo ding le Passport an i tuah tikah tlaih ding in SAC nih nawl an chuah, tiah Myanmar ram chung siangcachim phu in ṭuanvo ngei Ko Kyaw Way Phyo nih nihin April 19 ah RFA a chimh.
“A luancia March 26 ni ah Yangon Airport ah ramleng kal aa tim mi CMD rianṭuantu pahnih tlaih an ton hnu in CDM rianṭuantu cung ah fak deuh in cawlcangh an i timh caah atu bantukin SAC nih nawl an chuahnak a si,” tiah Ko Kyaw Way Phyo nih cun a chim.
“CDM rianṭuantu pawl hi ram chung ah an him ti lo caah ramleng ah phungning tein a lut mi le phunning lo in a lam kip in a lut cang mi tampi an um cang, atu bantukin ramleng chuah aa tim mi CDM rianṭuantu pawl cu a hlan ah SAC ralkap nih an rak tlaih bal cang hna, ka theihhngal mi pahnih zong ramleng chuah an i timh caah an rak tlaih hna i nihin tiang an thawng kan thei kho ti hna lo,” tiah CDM tuah mi fimcawnnak zung rianṭuan pakhat nih a chim ve.
Ministry kip nih CDM a tuah mi rianṭuantu an konglam cu April 18 ni tiang ah laak dih ding le ramleng kalnak vanlawng Ticket an cawk tik le Passport an i tuah tikah tlaih ding in SAC nih March 30 ni ah nawl an chuah, tiah CDM tuah mi nih an chim.
NUG sin cazin an pek mi ning ah hramhram in nawlngeihnak a latu SAC ralkap uknak ṭha lo duhlonak langhter in CDM a tuah mi vialte hi sing 4 leng an si.
Mizoram Ah Ralzaam In Aa Dor Mi Hna Nih An Zulh Ding Mi Zulhphung Cu CYMA Nih An Thanh>>>>>>>
Mizoram ramkulh chung ah ralzaam in aa dor mi Myanmar, Bangladesh le Manipur ramkulh mi hna nih an zulh ding mi zulhphung cu Central Young Mizo Association(CYMA) nih nizan April 18 ah an thanh.
Myanmar ram, Bangladesh ram le Manipur ramkulh in nun himnak ca ah, Mizoram ramkulh ah a rak i dor mi ralzaam mi nih Mizoram ramkulh nan um chung ah kan ram nih a ngeih mi phungphai le zulhphung cu ṭha tein nan zulh lai i, cozah le mizapi nih an dohkalh mi thil zeihmanh nan tuah lai lo, tiah CYMA nih ralrin peknak an tuah.
Ralzaam mi nih cozah le mizapi duh lo mi chawlehnak tuah le rithaisii zuar tibantuk tuah lo ding a si i, ram mi bantukin ṭha tein khuasak i timh ding a si lai. Cun, ralzaam mi nih cun cozah theihpinak tel lo in hmunram le inn a neih khawh lo caah hmunram le inn neih aa tim mi hna cu YMA nih theihpinak ca a ṭialpiak lai lo, tiah CYMA nih an thanh.
Cu pin ah inn le dawr hlan man kong ah mi nih an hlan lio mi a man nak tam deuh in laan le hlan tibantuk tuah hrimhrim lo ding a si. Myanmar le Bangladesh ram in ral a hung zaam mi hna cu India ram mi an si lo caah India ram mi lawng nih ngeih khawh mi Voter ID, Aadhaar Card, Birth Certificate, Tribal Certificate, Residential Certificate, Driving License le Vehicle Registration tibantuk zong tuah in ngeih i timh lo ding a si lai, tiah CYMA nih cun an thanh.
Ralzaam mi hna nih cozah phungphai he aa kalh mi le cozah nih a duh lo mi chawlehnak le rithaisii cawkzuarh kong ah biatak tein cozahpi bawmh i timh ding a si i, ralzaam mi cu ralzaam an si bantukin an duhnak hmun paoh ah i ṭhialkam le umhmun khuar i timh lo ding a si lai, tiah CYMA nih an langhter.
Branch/Group le Sub-Headquaters YMA nih anmahle an hmunram chung ah a um mi ralzaam mi hna an dirhmun ngiatthlai peng in, ṭhate zohkhenh ding in le unau sinak lungput ngei in a si khawh chung in bawmhchanh ding in CYMA nih nawlnak an tuah.
Central Young Mizo Association(CYMA) cu Mizoram ramkulh chung ah nawl a ngei mi le cozah he rian a ṭuanṭi mi bu a si i, ralzaam mi a bawmchan i a fimtawltu zong an si.
Myanmar ralzaam 30,000 leng, Bangladesh ram in ralzaam 1,000 leng le Manipur ramkulh in 10,000 leng cu Mizoram ramkulh chung ah an i dor lio a si, tiah Mizoram cozah nih an khawmh mi cazin ning in theih a si.
Leave a Reply