Mizapi nih bawmh mi hriamnam pawl a phan cang, tiah PDF-Zoland nih nizan April 19 ah thawng an thanh.
Ramchung, ramleng ah a um mi mizapi nih bawmh mi hriamnam pawl cu kan sin ah a phan cang tiin PDF-Zoland nih mizapi sin ah an langhter.
A luancia February thla dongh lei ah a voi 13nak raltuk cawnnak Basic Training an dih hnu ah atu bantukin hriamnam an vun langhter.
Zapi nih chunmang kan manh i kan i tinh cio mi SAC ralkap nawlngeihnak a hram bongh ding ca ah pehzulh in mizapi nih bawmhchanhnak tuah rih ding in ZFU/PDF-Zoland nih nawlnak an tuah.
PDF-Zoland cu Chinram, Tedim peng ah hrambunh mi hriamtlai phu an si i Chin hriamtlai phu unau chungtel an si.
Rikhiah ngei in India-Myanmar ramri Rih hlei an hon ṭhan: May 1 ah khar ṭhan an timh>>>>>>>>>>
India-Myanmar pehtlaihnak gate a si mi Rih hlei cu ni hnih chung khar a si hnu, nihin April 20 chun hnu sml. 1:00 ah rikhiah ngei in an hon ṭhan tiah theih a si.
“Tihni ah khan tlang an au i hlei an khar. Tiva tannak lam pawl zong an phih. Nihin cun an hon ṭhan nain April 30 tiang lawng hon ding a si lai an ti,” tiah India lei raal Zokhawthar khua ah a um mi pakhat nih Hakha Post ah a chim.
Hlei hon ṭhan ding in Zokhawthar khuami hna nih an hal hna caah Assam Rifles ralkap hruaitu hna le khuatlang hruaitu pawl bia an i ruah i April 30 tiang hon ding in biakhiahnak an tuah tiah theih a si.
“Hlei innka ah Assam Rifles ralkap nih biaktak tein an hngah. Inn ka an khar nain a lutchuak mi an um ahcun an honpiak hna,” tiah Zokhawthar khuami pakhat nih a chim.
Assam Rifles ralkap pawl nih voi dang nakin thilri biatak tein an chek i, cabuai i hun in minung lutchuak cazin zong an laak. India Cozah nawlpeknak in Assam Rifles nih an khar mi a si i, zalong tein ram hnih i tlawnkainak Free Movement Regime an hrawh mi hmalak hram an thawk zong a si kho, tiah tualchung mi nih an chim.
Hlei hon chung ah hin sii-ai, eidin le ni fatin herhhai thil dah ti lo a dang tlunkalpi khawh a si lai lo i May 1 ah hlei khar ṭhan a si lai tiah theih a si.
Leave a Reply