Poi Kho Tuk ee :Bangladesh Ram Ngatlai Pahnih Cu SAC Ti Ralkap Nih An Kah Hna I Hliam Fak Ngai An Pu

Bangladesh Ram Ngatlai Pahnih Cu SAC Ti Ralkap Nih An Kah Hna I Hliam Fak Ngai An Pu.Bay of Bengal rilipi ah Bangladesh ram mi ngatlaitu pahnih cu SAC ti ralkap nih an kah hna caah hliam fak ngai an pu, tiah Bangladesh Media nih an langhter.

Nizan April 21, zing suimilam 11:00 hrawng ah Bangladesh ram rili ah nga an tlai hnu, Naf tiva lei in tilawng in a kir mi Teknaf khuapi um mi pahnih Mohammad Ismael(kum 20) le Mohammad Faruq(kum 25) cu SAC ti ralkap nih tilawng in an dawi hna i an kah hna, tiah theih a si.

SAC ti ralkap nih an kah mi Bangladesh ram mi pahnih cu an pahnih in an hliamhma a fak i Teknaf Health Complex siizung ah pakhat, Cox’s Bazar siizung ah pakhat tiin a dangdang in an thlopbul hna, tiah theih a si. Mohammad Faruq hi a zual ngai i a nunnak ca ah thingphan a si kong, Bangladesh ram nawlngeitu pawl nih an ṭial.

Hi kong he pehtlai in Bangladesh ram ngatlai pakhat nih cun, “Kannih cu Bangladesh ram Naf tivapi chung ah a um mi kan si, Bangladesh thantar kan thlai i kap lo ding in kan theihter ko hna nain hramhram in an kan kah ṭhiamṭhiam ko,” tiah a chim.

Thawngpang Dang Rakrel Chih :Central Committee For Siyin Affairs(CCSA) Nih Hmunram Ngeitu Hnatlaknak Tel Lo In Kahdohnak Kalpi Lo Ding In Ralrinnak Peknak Tuah.Hriamtlai phu dang hmunram ah anmah theihpinak le hnatlaknak tel lo in ramri lonh in kahdohnak tuah lo ding in Central Committee For Siyin Affairs(CCSA) nih ralrin peknak cathanh an chuah.

Dohthlennak caan chung ah Chinram chung i hriamtlai phu khat le phu khat kar ah lungrualnak a tlau nakhnga lo hmunram ngeitu hriamtlai phu nih bawmh halnak maw, asiloah kaphnih kar hnatlaknak a um lo ahcun ramri lonh in kahdohnak kalpi lo ding in Central Committee For Siyin Affairs(CCSA) nih nizan April 21 ni ah ralrin peknak cathanh an chuah.

Peng pakhat hriamtlai phu nih kahdohnak kong ah bawmh halnak a tuah lo ahcun hmunram dang a um mi hriamtlai phu lut in ramri lonh in kahdohnak an kalpi mi cu pau dohthlennak le Chin miphun i fumtomnak ca ah thil ṭha nakin thil ṭha lo a chuah ding a fian caah cu bantuk ramri lonh in kahdohnak kalpi timh mi cu tuah hrimhrim lo ding, tiah Central Committee For Siyin Affairs(CCSA) nih an langhter.Credit : The Chin Post