Malaysia ah Chin Tlangval Pakhat Naamsawhnak in a Nunnak a Liam.Malaysia ram, Kuala Lumpur ah Chin tlangval pakhat cu naam in sawh a ton caah a nunnak a liam, tiah theih a si.Naam in sawh a tong mi pa hi kum 30 hrawng a si i Mindat lei mi a si. Nizaan April 22 zaan ah khan i velhnak a chuak i naam in sawh a ton hi a si, tiah a hawile nih an chim. Naam in a sawhtu pa hi Sagaing ramṭhen in Malaysia ah a phan ka mi a si i, a zaam caah palek nih an tlai kho rih lo, tiah theih a si.

Thawngpang Dang :Malaysia ah ralkap helicopter an i pah i minung 10 an thi.Malaysia ram ah ralkap helicopter pahnih an i pah caah aa cit mi minung 10 ning in an thi tiah theih a si.Aa pah mi helicopter cu HOM (M503-3) le Fennec (M502-6) model phun an si i April 23, zinglei sml. 9:32 ah an i pah tiah Malaysia Ti ralkap nih an fehter.

Hmai thla ah Malaysia Ti Ralkap kum 90 tlinnak ni tuah an tim i, cu ni caah cawnnak an ngeih lio ah an i pah mi a si tiah theih a si. Helicopter chung ah aa cit mi minung 10 ning in an thi, a nung mi pakhat hmanh an um lo tiah Perak ramkulh Palek Lutlai Mohamad Yusri Hassan Basri nih media pawl a chimh hna.

Social media ah a lang mi video ah cun helicopter pawl a phuphu in an zuang. Cu chung ah pakhat cu a kamlei ah aa kuaih lio ah a dang helicopter pakhat he an i pah i an pahnih in an tla. Zeiruang ah dah accident a can ti mi kan chekhlat lai tiah Ti Ralkap Zung nih an chim.

A Poi Tuk Ee :Moebe Kahdohnak ah Mizapi Ralkap 25 an Nunnak a Liam Cang.Shan le Karenni ramri Moebe khua i SAC ralkap sakhaan laak kahdohnak ah mizapi ralkap bu fonh lei in minung 25 an nunnak a liam, tiah theih a si.

Moebe SAC ralkap sakhaan (422) cu mizapi ralkap hna nih zarh hnih chung an tuk cang i, mizapi ralkap lei in a nunnak a liam mi an tam pin ah a ke a bul mi ralkap 15 hrawng zong an um, tiah mizapi ralkap ṭuanvo ngeitu pakhat nih a chim.

“Sakhaan chung ah SAC ralkap tam an taang ti lo nain ralkhamnak ṭha tuk in an i ser caah vun luh hnawh taktak ding ah a har ngaingai. Kan ralkap hliam tuar le a thi mi an tam nain dinh lo in kan nor thluahmah ko,” tiah a chim. Hi sakhaan dohnak ah hin mizapi ralkap lei in a ke a bul mi ralkap pali zong an i tel i pehzul in ral an do cuahmah ve, tiah theih a si. Credit : The Hakha post