Breaking News :Tuipuiral Group YMA le CNF cu April 22 ah khan tonbiaruahnak an ngei i, rithaisi dohnak rian hmun khat ah ṭuanṭi ding in hnatlaknak an ngei

Tuipuiral Group YMA le CNF cu April 22 ah khan tonbiaruahnak an ngei i, rithaisi dohnak rian hmun khat ah ṭuanṭi ding in hnatlaknak an ngei. Tuipuiral Group YMA le CNA nih hin Myanmar lei in Mizoram ah rithaisi a lut tawn mi khamnak ding ah rianṭuanṭi ding in hnatlaknak an ngeih kong aa hrawm in cathanh an chuah.

Thawngpang Dang Rakrel Chih :Mizo Zirlai Pawl(MZP) Headquaters Champhai Nih Ralzaam Mi Hna Zulh Ding Mi Zulhphung An Chuah.Mizoram ramkulh, Champhai khuapi hrambunh, Mizo Zirlai Pawl(MZP) nih an hmunram chung ah aa dor mi Myanmar ralzaam hna nih an zulh ding mi zulhphung an chuah mi cu nizan April 23 ni ah an thanh.

Myanmar ram buai ruang ah Myanmar ram mi tam ngai cu Mizoram ramkulh ah ralzaam in an i dor hna i, a cheu cu India ram mi lawng nih ngeih khawh mi theihpinak ca aa tlaih mi an um i ngeih ve ding in a tawlrel cuahmah mi an um hna, hi bantuk cu hmailei ah kan miphun ca ah chiatnak a chuahter khotu a si caah atu bantukin ralrin peknak kan tuahnak a si, tiah Mizo Zirlai Pawl(MZP), Headquarters Champhai nih an thanh.

Myanmar ralzaam mi cu India ram mi an si lo caah India ram mi lawng nih ngeih khawh mi Voter ID, Aadhaar Card, Birth Certificate, Ration Card tibantuk theihpinak ca ngeih a thiang lo, tiah MZP Headquarters Champhai nih cun an thanh.

Cu pin ah, cozah nih a kham mi rithaisii le chawlehnak tuah lo ding le chaw dawr, innhmun cawk a ngah lo i ralzaam cu ralzaam sinak bantuk tein um le khuasak i timh ding a si. Unau kan sinak fehternak ding ca ah phungbuar in hramhram thil tuah lo ding in kan in theihter hna, MZP nih a thanh mi zulhphung hna a tlamtling khawh nakhnga MZP, Headquarters Champhai nih fak piin rian kan ṭuan lai, tiah an langhter.

Champhai khuapi cu Mizoram ramkulh ramri um khuapi pakhat a si i, Chinram he ramri India–Myanmar ramri lei chawlehnak hmunpi a si, atu tiang ah Champhai pengkomh chung ah Myanmar ralzaam 10,000 leng an i dor, tiah theih a si.

Mizoram chung hmun kip ah Myanmar ralzaam 30,000 leng an um tiah theih a si i a luancia 18 ni zong ah Mizoram ramkulh chung ah nawlngei bik ah aa tel mi Central Young Mizo Association(CYMA) nih atu bantukin ralzaam nih zulh ding mi zulhphung an rak chuah ve.Credit : The Chin Post