Kachin ramkulh,Hpakant peng,Sezin khuate ah hram a bunh mi SAC LIB 116 sakhaan cu KIA le ttangti phu hna nih nihin April 24 zinglei sang ah tlamtlingin an laak khawh cang tiah theih a si.
Sezin khua um SAC sakhaan cu a luancia April 9 khan KIA le KPDF hna ibawm in doh hram an thok i Zarhhnih tluk an rauh hnu nihin April 24 zinglei sang ah an laak khawh hi a si.
“Nizan ah khan SAC ralhraang le ShanNi ralkap hna cu Sezin khua Phungki sianginn ah an rak phan cu KIA le KPDF nih an doh hna caah an zapi in an thio dih hna,a zaam mi zong cheukhat an um,cun nihin zinglei sang ah LIB 116 sakhaan zong cu kan nam i tlam tling in kan laak khaw,SAC ralhraang cheukhat an zaam hna,ni 15 chung kan tuk hna hnu ah a tu bantuk in kan laak khawh hi a si” tiah KIA thawnghram pakhat nih a chim.
KIA nih an laak mi Sezin sakhaan cu hmunhma thenhlimhnak tuahcuahmah a si i SAC ralkap zeizat an thih le hriam zeizat an laak kong zohfel cuahmah a si.a tu ah cun Hpakant-Tamakhan- Sezin lampi cung ah SAC sakhaan zeihmanh a um ti lo i KIA le ttangti phu hna nih hmunhma an laak viar cang tiah theih a si.Crd:CBN NEWS
Thawngpang dang: Chin hriamtlai phu unau nih a kalpi mi Operation nih aa tinh mi bantukin Kyindwe khuapi kahdohnak ah SAC ralkap nih zeitluk hmanh in thazaang chap in vanlawng in kahdohnak tuah hmanh seh law hnu kan tolh hrimhrim lai lo, tiah Chin hriamtlai phu unau nih an thanh.
Chin hriamtlai phu unau nih Kyindwe khuapi kan laak hlan lo fak deuh in kahdohnak an kalpi lai i khuapi laaknak ding ca ah a lam kip in a kan bawmtu AA cung ah a hlei in lawmh bia kan chim, tiah Chin hriamtlai phu unau nih cun an thanh.
Kyindwe khuapi cu a liamcia 2023 December 22 ni in Chin hriamtlai phu unau nih kah hram an rak thawk i a luancia April 20 ni tiang kahdohnak an kalpi ko nain SAC ralkap nih ralkap thazaang chap in vanlawng in kahdohnak an tuah ruang ah Kyindwe khuapi an laak khawh rih lo kong Chin hriamtlai phu unau nih mizapi sin ah theihternak an tuah.
Chin hriamtlai phu unau ti mi cu Zomi Federal Union(ZFU), Chin National Organization(CNO), Chin National Council(Mindat), Maraland Territorial Council(MTC), Chin Defense Force – Kanpetlet(CDF-Kanpetlet) le Chinland Defense Force-Matupi(Brigade 1) i fonh in dirh mi phu a si. The Chin Post
Leave a Reply