Myawaddy Khua Ah A Biapi Mi Tin-kan-nyi-naung Byuha A Ning In Kan Tlaih Cang Tiah KNU Nih An Thanh. KNU hruainak in dothlennak phu pawl nih Myawaddy peng, Tin-kan-ngyi-naung SAC battalion a ning in an lak khawh cang tiah KNU lei chimphuannak nawl a ngeitu Padoh Saw Taw Nee nih theihthernak a tuah chap.
Myawaddy um LIB 275 sakhaan ah KNLA le dothlennak phu pawl nih hmunhma la lo in SAC ralkap nih umhmun an khuar ṭhan caah khuachung kahdohnak caah a biapi mi hmunhma vialte cu kan tlaih dih tiah theihternak an tuah.
KNU phufonh nih March 7 ah kahdohnak fak an tuah i IB 355 an lak. March 11 ah Hpalu sakhaan, March 14 ah Kyaidone byuha, March 15 ah IB 356 sakhaan pawl n lak. Cun April 5 ah IB 357 le Tin-kan-nyi-naung byuha an lak.
IB 357 le Tin-kan-ngyi-naung byuha in byuha hmu tekh in ralbawi 67, adang ralbawi le ralkap 400 leng, an chungkhar pawl tiah chungkhar minung 617 cu KNLA nih kahdohnak a tuah ruang ah April 5 ah hriam chiah in a sung an pek.Cu sakhaan lak kahdohnak chung in hriam tampi an lak tiah KNU nih an thanh.
A Poi Tuk Ee: Kalay Peng, Pin-daw-oo khua ah SAC Ralkap Kah Mi Hriamngan Ruang Ah Hngakchia 2 Telh In Mipi 3 An Thi. Sagaing ramṭhen, Kalay peng chaklei, Pin-daw-oo khua ah SAC ralkap kah mi hriamngan a tla i a puah caah hngakchia 2 telh in mipi 3 an thi tiah thawng theih a si.
April 24 zaanlei sml 4:00pm luan hrawng ah SAC ralkap nih an kah mi hriamngan cu Kalay peng, Pin-daw-oo khua ah a tla i a puak, hriamngan puah ruang ah kum 10 hngakchia 2, kum upa 1 tiah minung 3 an thi tiah Kakay peng dothlennak phu nih an thanh.SAC ralkap nih April 24 ah Kalay peng, Nanchaung khua, Yaukchokwin khua hna cu an khangh, mipi hna an zaam tiah theih a si.
Up Date :Myingyan Peng Ah Sin-min Operation An Tuah I SAC Ralkap Sakhaan Pawl An Kah. Mandalay ramṭhen, Myingyan peng chung um SAC ralkap pawl nih hmunhma an khuarnak sakhaan pawl cu Sin-min Operation min in an kah hna i 60 MM telh in hriam le kuanzen pawl an lak khawh, SAC ralkap 20 hrawng an thi tiah Myingyan pengkomh PDF Battalion 2 (MGN Tiger) nih a thanh.
April 20 thawk in Sin-min operation min in Myingyan khuachung SAC ralkap nih hmunhma an khuarnak hmun 4 cu hmakhat te ah an kah hna.SAC ralkap le pyusawhti minung 60 hrawng umnak Myingyan khua chaklei Irawaddy tiva kam ah a um mi Gyi khua cu MGN Tiger le a hawikom phu nih an kah hna hi a si.
Kahdohnak hi sml 3 hrawng a rau i sakhaan an lak khawh, SAC ralkap le pyusawhti 15 hrawng an thi tiah MGN Tiger nih an thanh.SAC lei nih Semikhone tiva kam in bawmhnak an rak pek hna caah dothlennak phu lei an kir ṭhan, Myingyan pengkomh PDF No. 2 in hriamtlai Arka Min a nunnak a liam i adang hriamtlai 4 an i hliam tiah theih a si.
Gyi khua sakhaan lak kahdohnak ah 60 MM bom lung 9, MA-3 zuun 2, 5.56 kuan 125 an lak khawh.
Cun Myingyan peng hrambunh LIB 15 zong 107MM lung 2 in an kah i an i dornak buk a khen caah SAC ralkap 4 a khen hna i an thi tiah an langhter.
Cu bantuk in Myingyan peng, Semikhone tiva kam in SAC ralkap tilawng 2 le zung inn pawl zong Shock Missile in an kah hna leng ah Myingyan khuachung SAC ralkap hrambunhnak pawl zong drone in an foh hna tiah theih a si.Credit : The Chinland Post
Leave a Reply