April 25 zaan sml 8:00 ah Mindat peng, Circel-2 ah a um mi Vomthu Sii-inn cu SAC nih Jet Fighter in bomb a thlak caah sii-inn ah aa thlop lio mi tampi hma an pu i minung pahnih nak tam an thi tiah CDF-Mindat nih a thanh.
Vomthu Sii-inn lawng siloin khuami umnak hmun dang zong ah vanlawng in bomb an thlak tiah an langhter i thil sining a dikthlir in theih khawh a si rih lo.
Photo: CDF-Mindat
Nihin April 25, zanlei sml. 6:00 hrawng ah Zotung tlang, Rezua khuapi, Lawngye sang ah SAC ralkap nih an rak hmanh ta mi bomb a puak i taang ruk a kai lio mi pa ngakchia pakhat a nunnak a liam.
SAC bomb rap ruang ah a thi mi cu Bawi Lian Naing a si i, siang cachim in CDM a tuah mi Saya U Than Naing le Pi Van Sui fapa a si. U Than Naing te cu Rezua khua in an chuahkehnak Lailen khua ah raal an va zaam i an rak kirnak a sau rih lo tiah theih a si.
Lawngye sang cu SAC ralkap camp tang zawn ah a um mi a si i SAC ralkap nih bomb rap tampi an hmanhnak zong a si tiah kan theih.
“CDF-Zotung nih kan si khawhchung in bomb rap kan thianh ko nain kan hmuh khawh lo bomb rap a taang mi cheukhat ruang ah khuami pakhat kan sungh mi cung ah kan ngaih a chia tuk hringhran,” tiah CDF-Zotung in tuanvo ngeitu Salai Danny nih social media ah a tial.
CDF-Zotung nih kal um an khapnak Rezua khua chung hmun cheukhat le sakhan pawngkam ah chawhvah rih lo ding, lunghrin mi thil hmuh ahcun tawnghtham lo in tuanvo ngeitu sin thawngthanh ding zong theihternak a tialchih.Hmanthlak: Rezua khua
SAC ralkap nih an kah mi hriampi ruang ah Kalay peng, Pindaw-Oo khua ah tualchungmi paruk an nunnak a liam, tiah thawng kan theih.
Nizaan April 24, zaanlei sml. 4:00 hrawng ah SAC ralkap nih an kah mi kuanpi cu Pindaw-Oo khuachung ah a tlak caah kum 65 a si mi pa upa pakhat le ngakchia pahnih an nunnak a liam.
A cunglei minung 3 ruakvuinak cu nihin April 25 ah an tuah i, cu lio ah cun SAC ralkap nih hriampi in an rak kah chap hna caah ruakvuinak ah a kal mi chung in Khup Tuang Kim (kum 26) le Piang Khanh Suan (kum 30) hi an nunnak a liam than.
Cu lawng si lo in nizaan April 24 i SAC hriampi kahnak ruang ah hliamhma a pumi nu pakhat zong nihin ah a nunnak a liam than, tiah khuami nih an chim.
SAC ralkap hriampi ruang ah nizaan April 24 le nihin April 25 ah Pindaw-Oo tualchungmi paruk an nunnak a liam hi a si.
Myanmar ram Pau Dohthlennak kum 3 chung ah CDF-Mindat in ralkap 65 nih ram le miphun ca ah an nunnak an pek, tiah theih a si.
CDF-Mindat an dirhnak kum 3 tlin camtuak cu nihin April 24 zinglei ah Zoom in an tuah i, CDF-Mindat nih kum 3 chung an cawlcanghnak pawl report an tuah mi ah a cunglei bang in an langhter hi a si.
Kum 3 chung ah CDF-Mindat in ralkap 65 nih nunnak an pek pin ah hliamhma a pu mi ralkap 100 leng zong an um.
Nihin zinglei ah an tuah mi CDF-Mindat kum 3 tlin camtuak ah CRPH, CRCH, ICNCC, NUCC, MTC le dohthlengtu ralkap bu cheukhat in aiawhtu pawl an i tel kho, tiah theih a si.
Leave a Reply