29 April 2024
A luancia April 24 ni ah Chin National Defense Force (CNDF) nih Falam peng ah kahdohnak tuah lo ding in Chin National Army (CNA) cu an theihter hna.
SAC ralkap an umnak Falam khua cu lak ṭhan ding ah CNO/CNDF nih kum cheu deng timhlamhnak kan ngei cang i a tlamtling lai zong kan zumh caah CNDF le Chin Unau (Chin Brotherhood) theihpinak le lungtlinpinak tel lo in kahdohnak nan tuah lai lo, tiah CNDF nih CNA cu ca an kuat hna.
“CNA nih dothlennak nan tuahnak ah teinak hmu hram u” tiah CNDF nih an cakuat ahcun an langhter chih.
Atu bantuk ṭhiamṭhiam in PDF-Zoland zong nih a luancia April 17 ni ah Tedim peng ah kahdohnak tuah lo ding in CNA cu ralrin an rak pek hna. “Tedim khuapi laaknak ding ca ah zatuak 90 timhlamhnak kan ngei i, kahdohnak kan kalpi tikah a herh a si ahcun ṭangṭi ding in a hlankan in kan in theihter te ko hna lai, a hlankan in kanmah theihpinak le ceihmaipinak um lo in Tedim khuapi chung ah luhchuah le cawlcanghnak a um ahcun i timh lo ning in i kahnak a chuak kho mi a si caah PDF-Zoland nih cu bantuk cawlcanghnak cu kan kham,” tiah an thanh bal ve.
Cu kong he pehtlai in CNF/A chimnak nawlngei Salai Htet Ni nih cun, “Khuapi laak ding in kahdohnak kalpi timh mi kong ah hmunram ngeitu CDF cheukhat nih kan hmunram chung ah kahdohnak nan tuah kho lo tiin ca in seiseh an bia in siseh an kan ti tawn ti mi cu ngaihchia ngai a si, asinain kahdohnak cu hngah awk a ṭha lo i anmah caan pek awk an ṭhat lo caah kan si khawh chung in kahdohnak kan kalpi ko lai,” tiah Chinland Information Center(CIC) ah a chim.Crd : TCP
SAC ralkap nih Mindat peng Vomtu khua sizung vanlawng in bomb a thlak mi kong he pehtlai in Chinland Cozah le CNF/CNA nih duhlo langhternak ca an chuah.
Atu bantuk in sualnak ngei lo rammi hna cung ah tuksum sualnak a tuahtu SAC hi vawleicung ram hna nih dantatnak pek ding in le Vomtu sizung a thar in dirh a si ṭhan nakhnga bawmhnak peng ding in CNF/CNA nih halnak a tuah.
Vomtu sizung atu bantuk in bomb thlak a ton mi kong ah Chinland cozah zong nih duhlonak faakpi in a langhter i, a tuar-ing mi hna ca ah bawmhnak zong kan pek lai, tiah theihternak a tuah.
April 25, zaan sml. 8:00 hrawng ah SAC raldohnak vanlawng nih Vomtu khua sizung cu a tlawm bik bomb voi 6 a thlak i, mizaw le sizung rianṭuantu minung 5 an nunnak a liam pin ah minung 30 hrawng hliamhma an pu, tiah theih a si.
Mindat peng, Vomthu khuate ah a um mi sii-inn cu April 25 zaan sml. 8:00 ah SAC nih vanlawng in bomb a thlak caah minung 4 an thi i 15 hma an pu tiah theih a si.
A thi mi hna cu sii-inn ah aa thlop lio mi hna le mizaw congtu an si. Vanlawng bomb thlak ruang ah sii-inn le sii-inn quarter pawl zong an kaang, an rawkral dih tiah tualchung mi sin in kan theih.
“A thi mi pali an si. Pahnih hi bomb a thlak lio ah an thi i a dang pahnih cu an thi a chuah tuk caah a hnu deuh ah an thi tiah kan theih. Sii-inn le quarter cu remh awk tha lo in an rawk dih cikcek,” tiah tualchung mi pakhat nih a chim.
Vomthu khua cu Mindat khua in Chaklei meng 20 leng a hlatnak hmun ah a um mi a si i, Vomthu Sii-inn cu Mindat peng lawng si lo in Kanpetlet peng, Matupi peng, Magwe ramthen, Pakokko peng, Gangaw peng Yaw hmunram mizapi tiang nih an fuhpanh mi sii-inn a si tiah kan theih.
Photo: Salai Naing Hung, Law Thang
Karen ramkulh, Hpapun khua hrambunh LIB-434 SAC ralkap battalion cu dohthlengtu ralkap phu komh nih an laak i hriamnam tampi zong an laak khawh tiah theih a si.
April 25 zinglei ah Karen miphun hriamtlai KNLA, PDF, Force for Federal Democracy-FFD le BPLA i bawm in an laak mi a si tiah NUG, Runvennak Minister Zung nih a thanh.
Hpapun operation cu 2024 March 19 in an rak thawk mi a si i, March 24 ah Hpapun khuachung palek sakhan le outpost pawl an rak laak khawh.
March 30 ah Hpapun khua hrambunh IB-19 SAC ralkap battalion cu an rak laak cang i, hriamnam kuanzen tampi zong an laak.
Hpapun khua hrambunh ṭhiam ṭhiam a si mi LIB-340 battalion zong an kah cuahmah lio a si tiah NUG, Runvennak Minister Zung nih a langhter.
Photo: MoD
Leave a Reply