Up date :Chinland Council Le MZP Hruaitu Tonnak An Ngei

Chinland Council Le MZP Hruaitu Tonnak An Ngei.Nizan April 27 zaanlei suimilaam 4 ah Mizo Zirlai Pawl (MZP) hruaitu hna le Chinland Council hruaitu hna cu Mizo Zirlai Pawl (MZP) zung ah tonnak an ngei.

Chinland Council le Mizo Zirlai Pawl (MZP) nih cun atulio Myanmar buainak pinah ralzaam kongkau le rithaisii dohnak kong hna an ceih tiah MZP nih an thanh.Chinland Council hruaitu upa cheukhat hna cu Mizoram ah tlawng in MZP he tonnak an ngeih pinah CBCUSA hruaitu upa hna he zong tonnak an ngei cang.

Mizo Zirlai pawl(MZP) hi Mizo siangngakchia bu lakah a ngan bik mi pakhat a si i, thil dik lo a dohkalhtu(pressure group) bu pakhat an si pinah bawmhchanhnak a tuahtu bu zong an si. Myanmar rambuai ruangah Mizoram chung ralzaam a rak lut mi hna tuamhlawmtu le dirkamhtu zong an si.

Up Date : Thawngpang :Kawlram Passport Sok Thlennawn .Myanmar Passport tuah ningcang thlennawn a si. Cuhlan ah cun a hmun kal in sok a si tawn nain, atu cu maivan (online) in soknak tuah (booking) a si cang lai. Hi thlennawnnak hi Myitkyina, Monywa, Lashio, Taunggyi, Sittwe, Hakha, Pha-an, Mawlamyine, Dawei le Magway hrambunh Passort tuahnak hna ah thawk a si lai.

Hi kong he pehtlai in Myanmar Passport Issuing Board hna nih fehternak a tuah cang. Biachah ning bantukin May 2 in thawk le hman a si cang lai, tiah theih a si. 1 May zing suimilam 9 thawk in caan-hal (appointment) khawh a si lai tiah, MPIB nih a thanh.

Ramleng chuahnak Passport sok a duh mi, Yangon hmunram kulh um inng-taungsuh-sayin (household list) ngei nih Passport chuahnak zung ah QR Code hmangin sok khawh a si lai. Cun Kayah State inn-taungsuh-sayin ngei nih SAC tlaih mi cozah theihpinak catlap he Taungyi zung ṭeng a si mi Passport tuahnak ah sok khawh si lai. Adang ramkulh hmun hna ahcun anmah ramkulh inn-taungsuh-sayin he aa tlak ning in sok a si lai, tiah an chimchap.

Up Date :Kahdohnak Ruang Ah Rak Khar Mi Myanmar–Thailand Ramri No.1 Chitkyiyee Hlei An On Ṭhan Cang.
Myanmar–Thailand ramri Karen ramkulh Myawaddy khuapi kahdohnak ruang ah ni 6 chung rak khar mi Myanmar–Thailand ramri No.1 Chitkyiyee hleipi cu nihin April 27 zinglei suimilam 10:00 hrawng ah an on ṭhan cang i hlei luhnak ah mizapi i tlar in an hngak cio hna, tiah theih a si.”Mi tam-u cu Mae Sot khuapi ah ni 7 caam ding in Border Pass cauk ah chingchiahnak nampiak duh ah Myawaddy ah a kir mi an si,” tiah hlei a hngak mi pakhat nih RFA a chimh.

A luancia April 11 ni ah Khah-Lah-Yah 275 SAC ralkap pawl cu KNLA le PDF ṭangṭi phu nih an rak kah hna i SAC ralkap pawl cu Myawaddy lei No.2 hlei ah umhmun an rak khuar, cun April 19 zanlei ah KNLA le PDF ṭangṭi phu nih Drone in an kah hna i April 20 ni chun nitlak kaphnih kar kahdohnak a chuak i SAC ralkap nih vanlawng in kahdohnak an rak tuah, tiah theih a si.

SAC ralkap vanlawng kahdohnak ruang le kaphnih kar kahdohnak a fah ruang ah Myawaddy khuapi tualchung mi cu Thailang ram, Mae Sot khuapi ah an zaam hna i a cheu cu Thaungyin tivapi kam ah thlam sak in an i dor hna. April 21 ni ah Myanmar ralzaam pawl cu Thailand cozah nih Myawaddy khuapi ah a kuat hna hnu in Myanmar ram lei No.1 Chitkyiyee hlei zong an rak khar, tiah theih a si.Mywaddy No.1 Chitkyiyee hleipi cu an on ṭhan cang nain chawlehnak ca ah hman mi No.2 Chitkyiyee hleipi cu nihin April 27 chun tiang ah an ong rih lo, tiah theih a si.Credit : The Chin post