Thantlang Khuapi An Lak Khawh Lo Nak Cu CDF-Thantlang President Pu Uk Nun Bawi Nih Fianglak In A Chim. An Lak Khawh Lo Nak Aruangcu Kuanfang Le Hriamthil Kan I Zaat Ti Lo Ruangah Hnulei Kan Pil ṭhan, Tiah A Chim.
Laknak : Lungmili Post – Kan Dothlennak Kum 3 Chung Ah CDF-Thantlang In Ralkap A Thi Mi Zah/ Zat Langhter A Si. Dothlennak Caan Kum 3 Chung Ah CDF-Thantlang In Ralkap 40 Leng Nunnak A Liam.
Chin ramkulh, Thantlang peng chung ah hrambunh in dothlennak a tuah lio mi (Chinland Defense Force – Thantlang ) in dothlennak caan kum 3 chung ah ram le miphun caah nunnak a petu minung 42 an si, tiah theih a si.
Kum 3 chung ah CDF-Thantlang nih kahdohnak voi 40 leng a tuah i mizapi ralkap in minung 42 an nunnak a liam pin ah ram le miphun caah pum tling lo mi zong an tam ngai, cu pinah SAC ralhrang nih cunglei kahdohnak a tuah mi ruang ah tualchung mi 20 tluk deng nunnak a liam, tiah theih a si.
“Kum 3 chung ah CDF-Thantlang nih kahdohnak voi 40 leng a tuah cang i mizapi ralkap in minung 42 nih ram le miphun caah an nunnak an pek pin ah hliam a tuar mi zong an tam, SAC ralhrang nih cunglei in kahdohnak a tuah mi ruang ah CDF-Thantlang hmunram chung in tualchung mi 17 nunnak a liam” tiah CDF-Thantlang President Pu Uk Nun Bawi nih Online in April 28 ah a chim.
CDF-Thantlang cu a luancia 2023 kum chung ah Chin miphun ralkap CNA hruainak in ṭangṭi phu hna he Thantlang khuapi chung ah kahdohnak (Tilim Operation) voi 3 tiang an tuah i Thantlang khuapi chung ah SAC ralhrang nih umhmun an khuarnak dihlak cu luhhnawh in an kahdoh.
Cu kahdohnak ah SAC ralhrang thi mi le hliam a pu mi an tam i mizapi ralkap ṭangṭi phu zong in nunnak liam mi le hliam tuar mi an um ve, SAC ralhrang sakhanpi cu kan laak khawh dengmang nain kuanfang le hriamthil kan i zaat ti lo ruang ah hnulei kan pil ṭhan, tiah a chim chap.
CDF-Thantlang nih dothlennak caan chung ah hmunram ukhruainak zong a kalpi i pengtlang 5 chung um khua 51 ah zung 9 dirh in ukhruainak a kalpi lio zong a si, tiah theih a si.
Cu pin ah CDF-Thantlang nih Thantlang peng chung um khuate hna a daih khawhnak ding caah Thantlang khuapi luhchuahnak pawl cu nifate an hngah peng i SAC ralhrang he zong an i kaap lengmang, tiah theih a si.
Thantlang khuapi tualchung mi hna cu 2021, February thla thok in SAC ralhrang nih hramhram in nawlngeihnak a laak mi duhlonak langhter zong ah an i tel i hriamnam tlaih in dothlennak tuah zong ah tuan tein aa tel mi an si.
Cucaah SAC ralhrang chungtel pawl nih 2021, September thla chung ah Thantlang khuapi cu khangh in an hrawh dih i tualchung mi hna cu a himnak kawl in hmunkip ah ral an hrial hna, tiah kan theih. Lungmili Post
Leave a Reply