Chinland Cozah Foreign Minister Le Mizoram MP Ramri Ah Tonnak Ngei. Vaupi 29: 2024 Vaupi 19 zanlei thawk khan India le Myanmar i pehtlaihnak gate (Zokhuathar) khar cu a hmun ah ka mithring nih hmun in le thil sining theih duh ah 2024 Vaupi 24 chun ah ka va zoh. Ramri Gate khar nih kiangkap ah a ummi Chin miphun mizapi le Chin hrinthlak tuarnak fak pi’n a chuahpi khawh, Public Interest a si caah ka va veh tiah Pu K.Vanlalvena MP(Rajya Sabha) nih nizaan ah a langhter. Ramri Gate ka tlawn lio ah hin cawnnak le damlonak thil ah i tlawnkai hau ca lawng ah gate hi on a si. A hmun i a ummi nih an ka chimh ning ah Ministry of Home Affairs lei in bia an don bantukin
2024 Vaupi 23 ah Assam Rifles hruaitu hna nih cun ramri pawng i khuasa khuatlang hruaitu hna au in, ramri khar pehzulh a si lai kong le Vaupi thlachung cu Grace Period pe in Gate hi rikhiah in on a si lai kong. Biangreithlep 1 thawk in Champhai District chung ramri pehtlaihnak dihlak khar dih a si lai kong an chim. Ramri i pehtlaihnak khar lio le khar pehzulh timhnak cu MHA nawl bantukin kalpi a si lai kong Assam Rifles duty hna nih hin an ka chimh. Border Gate khar lio le khar pehzulh timhnak kong ah hin
ramri pawng khuasa Chinmi pawcawmnak a hrawh dih khawh caah khuaruah har in an vansang. Cun Border Gate kan veh hnu suimilaam tlawmpal ah Border Gate on a si kong le Biangreithlep 1 thawk in Border Gate khar timhmi cu leet than a si kong kan theih i lunglawmh awk ngai a si. Phung bantukin Border on a si caah le Border khar timhmi leet a si caah Ministry of Home Affairs le Central cozah cung ah ka lunglawmh bia ka chim, tiah Pu K.Vanlalvena MP(Rajya Sabha) nih maivan chung ah a langhter. Pu K.Vanlalvena MP(Rajya Sabha) nih ramri a vehnak ah hin Chinram lei kap in Chinland cozah Foreign Minister le Dr Sui Khar le Pu Puitea, Commander in Chief of CDF-Hualngoram zong hmuh khawh an si. Asinain zeikong dah an i ceih timi fianghlang in hngalh a si lo.
Myaing Peng Ah SAC Ralkap Nih An Thah Mi Nurse Pakhat Ruak Taklawng In An Hmuh || 29 April 2024 Magway ramṭhen, Myaing peng, sehzung 2 pawng ah SAC ralkap nih tlaihhrem in an thah mi Nurse pakhat ruak kan hmuh, tiah Ghost of Enemies – GOE Revolution Force in ṭuanvo ngei pakhat nih a chim. April 27 ni ah SAC ralkap pawl umhmun an khuarnak Myaing peng, sehzung pawng ah nu pakhat a thih kong tualchung mi nih an chim hnu in Ghost of Enemies – GOE Revolution Force nih chekhlatnak an tuah i
a ruak cu taklawng in an hmuh, a pawngkam ah thilpuan zong an hmuh. Cu pin ah siikhan zohnak bag pakhat chung ah hmanthlak le siikhan i zohternak catlap tete an hmuh kong Ghost of Enemies – GOE Revolution Force nih a chim. Thah a tong mi Nurse nu ruak cu ṭha tein an vui i an hmuh mi thilri pawl cu fim in a thi mi nu chungkhar zong an pehtlaih hna. Pauk peng, Hpalankaing khua palik sakhan in hnu a tolh mi SAC ralkap le palik pawl cu Wetpoke Pyusawhti khua le sehzung 2 lei ah an phan i ruak an hlonhnak hmun le SAC ralkap pawl umhmun an khuarnak hmun cu aa naih caah ruak cu a rannak in an khangh i an vui hnu ah tualchung hriamtlai phu pawl cu hnu an tolh, tiah Khit Thit Media nih a ṭial. Hmanthlak : Khit Thit Media
SAC Nih Kanpetlet Peng Ah Vanlawng In Bomb Thlak, Tualchung Mi Pakhat Nunnak A Liam! || 29 April 2024 SAC nih Kanpetlet peng chung ah vanlawng in bomb an thlak i tualchung mi pakhat nunnak a liam pinah midang pahnih hliam an pu, tiah theih a si. Nizan April 28, chun hnu suimilam 1:30 hrawng ah Kanpetlet peng, Lundon khua ah SAC nih vanlawng in voi 2 bomb a thlak. Bomb ruang ah hin kum 68 hrawng a si mi tarpa pakhat a ke a bul i, a hliamhma a fah caah zaanlei 3:45 hrawng ah a nunnak a liam. Kum 45 a si mi nu pakhat le
kum 18 tluk nungak pakhat zong hliam an pu i, kum 45 tluk nu cu a hliamhma a faak ngai, tiah tualchung mi pakhat nih a chim. Bomb ruang ah hin sii-inn pakhat, sianginn pakhat, siangcachimtu umnak inn pahnih le inn pali an rawk dih, tiah Kanpetlet peng mizapi ukhruaitu phu nih a thanh. Lundon khuami hna cu khuachung ah um ngam ti loin ramlak ah an zaam hna, tiah theih a si. Lundon khua hi khuate inn 30 fai hrawng umnak khua a si i, SAC nih vanlawng in bomb an thlak lio ah tualchung hriamtlai phu le SAC ralkap kar kahdohnak a um lo, tiah tualchung mi nih an chim.
Falam Peng Ah Kahdohnak Tuah Lo Ding In CNDF Nih CNA Theihter ll 29 April 2024 A luancia April 24 ni ah Chin National Defense Force (CNDF) nih Falam peng ah kahdohnak tuah lo ding in Chin National Army (CNA) cu an theihter hna. SAC ralkap an umnak Falam khua cu lak ṭhan ding ah CNO/CNDF nih kum cheu deng timhlamhnak kan ngei cang i a tlamtling lai zong kan zumh caah CNDF le Chin Unau (Chin Brotherhood) theihpinak le lungtlinpinak tel lo in kahdohnak nan tuah lai lo, tiah CNDF nih
CNA cu ca an kuat hna. “CNA nih dothlennak nan tuahnak ah teinak hmu hram u” tiah CNDF nih an cakuat ahcun an langhter chih. Atu bantuk ṭhiamṭhiam in PDF-Zoland zong nih a luancia April 17 ni ah Tedim peng ah kahdohnak tuah lo ding in CNA cu ralrin an rak pek hna. “Tedim khuapi laaknak ding ca ah zatuak 90 timhlamhnak kan ngei i, kahdohnak kan kalpi tikah a herh a si ahcun ṭangṭi ding in a hlankan in kan in theihter te ko hna lai, a hlankan in kanmah theihpinak le ceihmaipinak um lo in Tedim khuapi chung ahluhchuah le cawlcanghnak a um ahcun i timh lo ning in i kahnak a chuak kho mi a si caah PDF-Zoland nih cu bantuk cawlcanghnak cu kan kham,” tiah an thanh bal ve. Cu kong he pehtlai in CNF/A chimnak nawlngei Salai Htet Ni nih cun, “Khuapi laak ding in kahdohnak kalpi timh mi kong ah hmunram ngeitu CDF cheukhat nih kan hmunram chung ah kahdohnak nan tuah kho lo tiin ca in seiseh an bia in siseh an kan ti tawn ti mi cu ngaihchia ngai a si, asinain kahdohnak cu hngah awk a ṭha lo i anmah caan pek awk an ṭhat lo caah kan si khawh chung in kahdohnak kan kalpi ko lai,” tiah Chinland Information Center(CIC) ah a chim.
Leave a Reply