Breaking News :Kyindwe Khuapi SAC Sakhan Cu Chin Brotherhood Nih An Laak Kong An Thanh

Kyindwe Khuapi SAC Sakhan Cu Chin Brotherhood Nih An Laak Kong An Thanh.Kanpetlet peng, Kyindwe khuapi um SAC ralkap sakhan cu Chin Brotherhood le hriamtlai phu dang hna fonh in April 29 ah an laak kong Chin Brotherhood nih an thanh.

“Kanpetlet peng, Kyindwe khuapi SAC ralkap sakhan cu a luancia December 22, 2023 in CDF-Kanpetlet, CDF phufonh le PDF hna nih kan rak kah i hriamnam le thilri tel in harsatnak tampi lak ah thla-thum deng din lo in kan kah hnu ah, 7 March 2024 thawk in Chin Brotherhood Operation min bunh in hriamtlai phu dang hna he i bawm in kan pehzulh. Ni 54 kan rauh hnu, April 29 zing suimilam 9:30 ah sakhan cu a ning piin kan laak khawh pin ah hriamnam le thilri zong tampi kan laak” tiah Chin Brotherhood nih cathanh an chuah.

Thla 4 leng Kyindwe SAC ralkap sakhan kahdohnak ah bawmchantu mizapi le kan ralkap pawl an ralṭhatnak le nawlngaihnak cung ah Chin Brotherhood nih upatnak kan in pek hna i, kahdohnak ah nunnak le takpum a petu ralkap nan dihlak Chin Brotherhood nih thinlung dihlak in upat kan in pek hna, tiah an cathanh ah cun an langhter.Hi kahdohnak ah hin Chin Brotherhood, PDF, YDF, GZA le LPDF hna an i tel, tiah theih a si.

Thawngpang dang Rak Rel Chih :Global Chin (Falam) Organisation (GCO) nih Falam Um SAC Ralkap Cu Kap Hrimhrim Lo Ding In Nawlnak An Tuah .Global Chin (Falam) Organisation (GCO) nih Falam mizapi zawnruahnak le hmailei ah pakhat le pakhat kar ah buainak a chuah chin lo nakding ah Falam khuapi um SAC ralkap pawl cu kap hrimhrim lo ding in dawtnak he kan i nawl hna, tiah April 30 ah cathanh an chuah.

“Tulio social media le hmun dangdang ah CNA nih Local base theihpinak le lungtlinpinak tel lo in Falam um SAC ralkap kah an timh ti mi thawngpang theih ding a tam i hi thawngpang hi a dik mi a si lai cu kan zum lo nain hi lungput he CNA lei in ruahnak a um a si ahcun Falam mizapi zawnruahnak le hmailei ah pakhat le pakhat kar buainak a chuah chinhin lo nakding ah Falam um SAC ralkap cu kap hrimhrim lo ding in dawtnak he kan in nawl hna,” tiah Global Chin (Falam) Organisation (GCO) nih an langhter.

Global Chin (Falam) Organization (GCO) hi 2017 lio Falam Ruun-Inn Tlun Puaipi ah hmunkip le ramkip um Falam tefa hruaitu pawl i tong in vawlei pumpi huap (Global) Falam tefa dihlak aiawh in dirh mi phu a si.Credit : The Chin Post