Hakha Khuathar biakinn 10 leeng an khar. Chin Ramkulh, Hakha Khuathar ah SAC nih minung panga cung i pumh lo ding in nawl a chuah hnu biakinn 10 leeng biakinn an khar tiah khuami hna sin in theih a si.
Hakha khuathar sang ah SAC ralkap kuttang riantuan hna nih June 20 tiang minung 5 cung pumh ti lo ding in nawl a chuah. Hi nawl chuah ruang ah Khuathar chung um biakinn 11 cu an khar cang tiah sang chung mi pakhat sin in thawng kan theih.
“Khuathar sang chung i Minister pawl an kah hnu hna khan nawl an kan chuah hnawh. Hi nawl an chuah mi chung ah minung 5 cung pumh ngah lo tiin aa tel. Hi bantuk a si tik ah biakinn a khar mi kan um pah len cang. A zapi biakinn khar a si mi hi 11 a si cang,” tiah min langhter duh lo pakhat nih ChinTalk ah a chim.
Hakha khuathar sang chung i an kah hna ruang ah minister pa le a nupi cu fak ngai in hliam an tuar i minister pawl umnak ah um ti loin hmundang ah an thial hna. Cun, biakinn ah pumh an kham lawng si loin sang chung dawr zong an khar ter dih hna i nihin tiang dawr ong an um rih lo tiah theih a si. ChinTalk
Thawngpang dang: Rakhine ramkulh, Maungdaw peng chung um SAC thazaang 500 tluk umnak ramri hngak Kyi-Kan-Pyin headquarter cu Arakan Army (AA) nih an kah i an laak tiah kahdohnak thawng laaknak hrampi nih Khit Thit Media ah a chim.
Arakan Army AA nih Kyi-Kan-Pyin headquarter cu 2024, April 25 ah Arakan Army (AA) nih kah hram an thawk i May 2, zaan suimilam 11:30 tluk ah tlamtling tein an laak, ralhrang chungtel 100 tluk Bangladesh ram chung ah an zaam tiah theih a si.
“Ramri hngaktu Kyi-Kan-Pyin headquarter hi 2024, April 25 ah drone le hriamnam dang in kah hram an thawk i ralhrang thi le hliamtuar an um pin ah tlaihkhih mi zong an um, Bangladesh ram chung ah zeimawzat an zaam rih” tiah an langhter.
A tu ahcun Kyi-Kan-Pyin headquarter dihlak hi Arakan Army (AA) kuttang ah a um cang, Kyi-Kan-Pyin ramri hngak headquarter le thlanglei headquarter cu 2024, April 2 zaan suimilam 12:00 tiang in pehtlaihnak an ngei kho lo tiah theih a si.
Leave a Reply