SAC Ralkap Nih Pyidawtha Khua Ah Sualnak Ngei Lo Tualchung Mi 2 An Thah Hna. Kalay peng, Pyidawtha khua ah SAC ralkap nih sualnak ngeilo tualchung mi pahnih an thah hna, tiah theih a si.
Pyidawtha khua hi SAC ralkap nih May 1 khan an khangh i tualchung mi hna cu khua chuahtak in an zaam. Khua a chuahtak ve lo mi pahnih cu nizan May 2 ah khan SAC ralkap nih an thah hna, tiah theih a si.
April 30 le May 1 ah SAC ralkap le tualchung hriamtlai phu kar kahdohnak a chuah hnu in, inn 1,000 hrawng a umnak Pyidawtha khua hi SAC ralkap nih an khangh i, drone zong in kahdohnak an tuah caah inn zeizat dah a kangh ti hngalh khawh a si rih lo.
A luancia April 5 in Kalay chaklei ah hin SAC nih khuate an khangh ṭhan hna i, khua 5 in inn 600 hrawng an khangh cang. SAC ralkap pawl cawlcanghnak ruangah tualchung mi 8,000 hrawng innlo chuahtak in an zaam hna, tiah theih a si. The Chin Post
Thawngpang dang: Rakhine ramkulh, Maungdaw peng chung um SAC thazaang 500 tluk umnak ramri hngak Kyi-Kan-Pyin headquarter cu Arakan Army (AA) nih an kah i an laak tiah kahdohnak thawng laaknak hrampi nih Khit Thit Media ah a chim.
Arakan Army AA nih Kyi-Kan-Pyin headquarter cu 2024, April 25 ah Arakan Army (AA) nih kah hram an thawk i May 2, zaan suimilam 11:30 tluk ah tlamtling tein an laak, ralhrang chungtel 100 tluk Bangladesh ram chung ah an zaam tiah theih a si.
“Ramri hngaktu Kyi-Kan-Pyin headquarter hi 2024, April 25 ah drone le hriamnam dang in kah hram an thawk i ralhrang thi le hliamtuar an um pin ah tlaihkhih mi zong an um, Bangladesh ram chung ah zeimawzat an zaam rih” tiah an langhter.
A tu ahcun Kyi-Kan-Pyin headquarter dihlak hi Arakan Army (AA) kuttang ah a um cang, Kyi-Kan-Pyin ramri hngak headquarter le thlanglei headquarter cu 2024, April 2 zaan suimilam 12:00 tiang in pehtlaihnak an ngei kho lo tiah theih a si.
Leave a Reply