Magway ramṭhen, Saw peng, Kyaukhtu pengṭhen, Ahkyipanpalun khua phungki sianginn ah SAC ralkap nih kahdohnak um lo in vanlawng in bomb an thlak ruang ah phungki sianginn a kaang dih i tualchung mi 20 hrawng an nunnak a liam pin ah minung 30 leng hliam an tuar kong, Yaw Alintan in ṭuanvo ngei pakhat nih a chim.
Nizan May 9, zing suimilam 11:00 hrawng ah kahdohnak um lo in Saw peng, Kyaukhtu pengṭhen, Ahkyipanpalun khua phungki sianginn ah tualchung mi le tualchung mi bawmhnak ca ah thilri phurtu motor ngei pawl tonbiaruahnak an ngeih lio ah SAC ralkap nih raltuknak vanlawng Jet Fighter in pound 500 a rit mi bomb lung 4 an thlak ruang ah phungki sianginn a kaang dih i ruak 16 an char, minung 30 leng hliam an tuar, tiah theih a si.
“Ruak 16 char a si i ruak kangh ning a fah caah aho an si zong hngalh a si lo, phungki siangiin zong cu a kaang dih i a tung lawng a taang, a thi mi hi minung 20 hrawng an si lai kan zumh, cu nak tam deuh zong si khawh si, a taang mi cu an tlau i kan hmu kho hna lo, ngakchia, pa le nu zong theih khawh an si lo, phungki pakhat tu cu khual a tlawn lio a si i hliamtuar ah aa tel lo,” tiah Yaw Alintan in ṭuanvo ngei pakhat nih cun a chim.
Tonzaang Khuachung ah Kahdohnak Tuah Lo Ding in Khua Upa le Biaknak Lei nih Nawlnak an Tuah May 9 || Tonzaang khuachung ah kahdohnak tuah lo ding in Tonzaang Khrihfabu kip fonh le khua upa hna nih nawlnak ca an chuah, tiah theih a si. Atu bantuk in biaknak lei le khua upa lei nih ca an chuahmi kong he pehtlai in “Democracy ram sernak rian a khul fumter le hnahnawhnak pek kan i timh caah a si hrim lo; mizapi zawnruahnak lungthin he nawlnak kan tuahmi a si,” tiah an langhter. Tonzaang khuami pakhat nih,
“Kha ca an chuahmi kha ahmaanmi a si ko. Khuachung ah kahdohnak a um ahcun inn vialte zong an kaang dih hnga. Mahcahcun, meeting an tuah i khatikhan ca an chuahmi a si,” tiah a chim. Atukar hrawng Tonzaang khuachung ah kahdohnak a um lai timi thawngpang a len caah Palek sakhaan pawngkam ah a um mi chungkhar 15 hrawng cu hmundang ah an i ṭhial hna. CDF-Tonzaang nih, “SAC ralchanh in Operation kan tuahmi hi mizapi khuasaknak hrawhhral ding in kan i tinhmi a si lo; SAC ralkap le anmah he a ṭangmi bu pawl ṭhawldawi kan duh hna caah a si,” tiah May 7 ah ca an chuah ve. Tonzaang peng chung ah hin ZRA an um bang in CDF-Tonzaang, PDF-Zoland le Thado-PDF zong an um, tiah theih a si.
Thlanglei Laitlang Cindwe Khua Kiangkap ah Chin Unau Phu le SAC Ralkap Karlak Kahdohnak Pehtlai in a Um Rih . May 9 || Kanpetlet peng, Cindwe khua kiangkap ah SAC ralkap le Chin Unau Phu karlak ah pehtlai in kahdohnak a um, tiah CDF-Kanpetlet ralkap nih an chim. “Nitin ti awk in kahdohnak a um. SAC nih vanlawng zong in kah a bawmh hna. SAC ralkap lawng si lo in Pyosawhti he an si i, thazaang 500 hrawng an si lai. Cu pawl cu an hnu in kan dawi hna i kan kah hna,” tiah CDF-Kanpetlet ralbawi pakhat a si mi
Salai Tun Ling Thang nih a chim. Hi SAC ralkap le Pyosawhti pawl hi AA hruainak in Chin Unau Phu, le PDF nih April 29 ah Cindwe khua an laak lio ah ramlak ah a zaam mi an si, tiah a chim chap. Cindwe khua laak kahdohnak ah hin chawva tam tuk a dih caah le leiba Ting thongkhat renglo kan ngeih caah ramchung le ramleng um mizapi nih bawmhnak pek cio ding in CDF-Kanpetlet nih tlawmsuknak zong a tuah, tiah theih a si.
Inn Khangh Le Hramhram In Thil Chuh A Hmang Mi Tawpu Khua Pyusawhti Nu Pathum An Tlaih Hna || 9 May 2024 Sagaing ramṭhen, Monywa peng, Tawpu khua um mi, inn khangh a hmang mi le hramhram in tualchung mi thil chuh a hmang mi Pyusawhti hruaitu nu pakhat telh in Pyusawhti nu pathum tlaih an si kong, Area 71 PDF Monywa in ṭuanvo ngei pakhat nih a chim. A luancia May 4 ni ah nitlak chaklei Division Headquaters siizung chung ah bomb hliam a pu mi ngakchia siizung in a chuah lio ah
Tawpu khua mi Pyusawhti hruaitu nu Khine Khin U, Pyusawhti Chit Yay Naing nupi Mihti le Pyudawhti Htay Nyunt nupi Aye Myat Mon tiin Pyusawhti pathum cu lampi ah an tlaih hna i phung he aa tlak ning in dantat ding in peng chung mizapi humhimtu phu Pah-Lah-Phah sin ah an ap hna. Lampi ah tlaih mi Pyusawhti nu pathum chung ah Pyusawhti hruaitu Khine Khin U cu tualchung mi umnak inn a khaangtu le hramhram in thil chuh a hmang mi a si kong tiah Khit Thit Media nih a ṭial. Hmanthlak : Khit Thit Media
Mindat Khuapi Ah A Um Mi SAC Ralkap Pakhat Cu CDF-Mindat Sin Ah Aa Ap || 8 May 2024 Chinram, Mindat khuapi ah a um mi SAC ralkap pakhat cu hramhram in nawlngeihnak a latu SAC ralkap rianṭuannak duh lo in pau dohthlennak ah i tel ve ding in a luancia May 5 ni ah khan Chin Defence Force – Mindat sin ah aa ap. Mindat khuapi hrambunh Khah-Lah-Yah 274 ah rianṭuanter mi Kyaukhtu khuapi hrambunh Ah-Mah-Tah 368 Battalion in pumpak No.Ta/206455 Corporal Win Lay nih cunMA-3 pakhat, kuanbawm 3, meithal kuan 256 i put in CDF-Mindat sin ah aa ap caah CDF-Mindat nih tangka Kyats sing 50 an pek. Chin Defence Force-Mindat sin ah CDM tuah in pau dohthlennak ah aa tel mi cu lunglawm tein kan cohlan hna i hriamnam he aa ap mi cu tangka kan pek hna leng ah a himnak hmun an phak tiang ṭuanvo kan laak hna, tiah CDF-Mindat nih cun an thanh.
Leave a Reply