Kalay peng Thlanglei, Laimi umnak Angteng (Setaw) khuate cu SAC nih miakpi in an kah caah sualnak ngei lo khuami pahnih nunnak a liam i pakhat hma faak a pu tiah kan theih.
Nizan May 10, chun hnu sml. 1:00 hrawng ah Kabani hlei ah umhmun a khuar mi SAC ralkap nih 120 MM miakpi voi hnih an kah caah Pu Cia Luai le Pu Pa Mawng nunnak a liam tiah theih a si.
Kahdohnak zeihmanh a um lo nain SAC ralkap nih miakpi an kah mi a si i, SAC ralkap nih atu bantuk zawndamh in hriam ngan an kah lengmang ruang ah Kalay peng chung khuami tampi nunnak a liam cang tiah kan theih.
Kanbulu peng SAC ralkap sakhan laak kahdohnak ah SAC lei 6 an thi i hriamnam zun 14 an laak PDF ralkap 10 le khuami pakhat an thi ve>>>>>>
Kanbulu peng, Malel khua SAC ralkap sakhan laak kahdohnak ah SAC ralkap lei in 6 an thi, hriamnam zun 16, kuanzen hna le thilri kan laak khawh tiah PDF No.1 Command nih a thanh.
May 7 ah Malel khua ah a um mi SAC ralkap le Pyusawhtee pawl sakhan cu PDF phu komh nih an kah i an laak khawh. Cu kahdohnak ah cun PDF ralkap 10 nih ram caah an nunnak an pek i khuami pakhat zong a thi tiah theih a si.
Dohthlengtu ralkap lei nih kut ser meithal tel in meithal zung 14, zenthong 700 leng, kuan bawm 11, kut cheh bomb 1, Inaga bomb 6, Jammer 1, Equipment 4, Uniform tuah 3 le ralkap thilri zeimaw zat an laak khawh.
Kahdohnak ah SAC ralkap nih miakpi in voi 60 leng a kah hna, valawng in voi 14 a kah hna i Y-12 vanlawng in bomb 60 leng a thlak hna tiah an ṭial.
Thabeikkyin peng, Kyaukhpyar khuate in SAC ralkap 70 hrawng nih an rak bawmh hna caah PDF ralkap 10 le khuami 1 an thi i, 17 hma an pu tiah theih a si.
Leave a Reply