2024 May 14 — Mindat khua ah hram a bunh mi LIB 274 nih Mindat peng, Namṭha khua um thinlung lei ngandam lo pa pakhat cu May 13 chun sml 1:00pm hrawng ah meithal in an kah i a thi tiah theih a si.
SAC ralkap pawl nih kah ruang ah a thi mi pa ruak cu Mindat khua sizung ah an chiah rih tiah theih a si. Cu pa a thihnak kong he pehtlai in SAC ralkap le palek pawl nih thawngpang lenter lo an i zuam tiah theih a si.
May 13 chun sml 2:00pm hrawng ah SAC ralkap pawl cu Mindat khua leng nichuah lei ah a um mi Bawngthe khua lei ah hriamngan an kah caah hliam a tuar mi an um kho men tiah Zalen nih a langhter.
2024 May 8 ah Hmatpungṭin tuah ding in Mindat khua ah a kal mi nu 2 chung ah pakhat cu a luat cang i adang pakhat hi LIB 274 nih an hren i bia an hal lio a si tiah Zalen nih a ṭial.
Kachin ram, Mansi khua le Mongmit khua cu KIA le dothlennak phu pawl nih an kah i khua an uk hram an thawk cang tiah KIA lei kahdohnak thawngzamh nih an langhter.
Khuachung ah hriam chia duhlo in a tang mi ralkap battalion pawl fak pi in an kah hna i SAC nih van lei hmang in a kham len ko nain khua an tlaih khawh mi dirhmun a phan cang tiah theih a si.
Mansi khua leng IB 601 le IB 319 sakhaan 2 cu KIA hruainak in dothlennak phu pawl nih an kah cuahmah lio a si.
Cu lio caan ah Kachin ram, Mongmit khua zong KIA hruainak in dothlennak phu pawl nih May 8 thawk in an uk khawh cang.
Atulio khua leng ah a tang mi Mongmit khua hngaktu IB 437 sakhaan cu KIA nih a kah cuahmah lio tiah an langhter.thawngdang >>>>>>
Kahdoh a fahnak Buthidaung peng in Rohingya 7,000 leng cu AA a tlaihnak hmunhma chung ah an rak lut hna tiah AA lei minung le minung bawmhnak le thanchonak phukomh zung nih May 13 ah an thanh.
SAC ralkap hriamngan kahdohnak, vanlei kahdohnak ruang ah Buthidaung peng Ka-gya-bat, Ka-gya-bat-kan-pin, Myaung-na, A-lay-chaung, Ba-gone-na, Lat-tha khua in Rohingya hna cu May 8 thawk in an zaam hna hi a si.
AA nih a tlaihnak hmun tiah an thanh ko nain hmunhma a fiang in an langhter lo.
AA nih a thlah mi muicawl chung ah a zaam mi Rohingya pawl kha AA ralkap nih himnak an lakpiak hna zong kha hmuh khawh a si.
Buthidaung peng ah SAC MOC 15 kuttang battalion 4 AA nih a lak cang. A tang mi battalion pawl zong AA nih a kah cuahmah lio hna i Maungdaw, Ann, Thandwe hna ah AA le SAC ralkap karlak ah kahdohnak a fak.
Leave a Reply