Kachin ramkulh, Tanai peng, Nambyu khua SAC ralkap sakhan ngan cu KIA hruai mi ṭangṭi phu nih nihin May 16 zinglei ah an laak kong, KIA thawng laaknak hrampi nih an chim.
Nihin May 16, zinglei suimilam 7:30 ah Tanai peng, Nambyu khua ah a um mi Khah-Lah-Yah 297 le Khah-Lah-Yah 260 sakhan ngan cu KIA ṭangṭi phu nih zarh khat tluk an kah hnu ah a ningpi in an laak, tiah theih a si.
“Cu sakhan ngan mi cu sakhan pahnih fonh a si i, sakhan chung ah an chiah mi hriamnam zong tam ngai an laak. SAC ralkap nih raltuknak vanlawng in kahdohnak an tuah i bomb an thlak ve, SAC ralkap thi zat le hriamnam laak zat tu cu fiang in theih a si rih lo,” tiah KIA thawng laaknak hrampi nih an chim.
KIA nih a luancia March 7 ni thawk in Kachin ramkulh chung ah kahdohnak an kalpi i SAC ralkap sakhan 90 hrawng an laak cang, tiah theih a si.
Ywa Shay Ni 2 Chung Kahdohnak Ah SAC Ralkap 60 Hrawng An Thi>>>>>>>>>>>>>
Mandalay ramthen, Myingyan peng, Ywashay khua cu SAC ralkap nih May 13 thawk in an luh caah ni 2 chung kahdohnak a chuak i SAC lei 60 hrawng an thi, 80 hrawng an i hliam tiah theih a si.
SAC ralkap pawl cu May 13 thawk zinglei ah thazang 200 hrawng in Ywashay khua an lut i dothlennak phu pawl nih an kah hna caah a nikhatnak ah SAC ralkap pawl hmainor ngam ti lo in a thi mi an tam tiah theih a si.
May 14, a ni 2 nak zinglei ah Ywashay khua cu SAC ralkap pawl nih an luh hnawh than hna i ti lei ralkap nih hriamngan kah a bawmh hna leng ah drone in a kah hna caah dothlennak phu lei an kir than tiah theih a si.
Ni 2 chung kahdohnak ah SAC lei 60 hrawng an thi i 80 hrawng an i hliam bantuk in Myingyan Black Tiger lei minung 15 thinphan awk um tuk lo in an i hliam tiah an thanh. Cu hnu ah SAC ralkap pawl nih Ywashay khua ning in an khangh i minung 4 zong a ruang um lo in an thah hna tiah theih a si.
SAC lei a thi mi an tamtuk caah SAC lei nih PHAW mawtaw 2 in an ruak an lak hna tiah theih a si.
“Khua hi tiva he aa hlat ngai. Asinain khuachung ah hriamngan an kah. Kahdohnak ruang ah khuami zapi aa naihnak ramlak ah an zaam cio hna. Thah a tong mi minung 4 hi upa pawl an si. A umkal kho ti lo mi upa an si hna. Cu chung ah khua a hmu lo mi zong aa tel” tiah MBT phu hruaitu nih Maung ah a chim.
Ni 2 chung Kahdohnak ah MBT, Brightster Group, Popa Guerrilla Force, Royal Eagle People Defense Force, Myingyan Danger Dynamit, Drone Fighter, Kani – D.F.K, Anyar Federal Task Force, 27 Vollution Force, BGF le adang dothlennak phu pawl an i bawm hna tiah theih a si.
Leave a Reply