Tedim khuapi suimilam tung pawng ah nihin May 27 zanlei suimilam 4 hrawng in SAC ralkap nih inn an khangh, tiah theih a si.
Tedim khuapi chung SAC ralkap pawl cu Chin Brotherhood nih nizaan in kah an thawk i nihin tiang kahdohnak a fak. Chin Brotherhood lei nih SAC ralkap sakhan pakhat an laak i, SAC lei ralkap 4 an thih pinah 9 an tlaih hna, tiah theih a si.
Tedim khuapi um mi cheukhat cu khuapi chuahtak in an zaam hnu ah zanlei suimilam 4 luan hrawng in SAC ralkap nih inn cheukhat an khangh, tiah theih a si. Atu tiang ah inn zeizat dah a kangh ti theih khawh a si rih lo.
Tedim Khuapi Ah Kahdohnak A Chuak>>>>>>>>
Nizan May 26 zaan suimilam 10 hrawng ah Tedim khuapi um SAC ralkap sakhan cu PDF-Zoland le ṭangṭi phu nih an kah i nihin May 27 zing tiang meithal thawng theih a si. SAC lei nih vanlawng in bomb an thlak i tualchung mi in hliamtuar zong an um, tiah theih a si.
SAC ralkap nih Leilum sang le Leitawhtan sang lei ah hriamngan le hriamhme an kah caah tualchung mi cheukhat cu innlo chuahtak in an zaam hna, tiah theih a si. “Tuzing lei ah SAC vanlawng Y12 nih voi 8 bomb a thlak i, Jet fighter pakhat nih in voi 3 kahdohnak a tuah ve,” tiah tualchung mi nih an chim.
Atu tiang ah ah khua mi pahnih fak ngai in hliam an pu tiah theih a si nain hliamtuar mi hi an tam deuh kho, tiah ruah a si.
Tedim khuapi kahdohnak kong he pehtlaih in ZFU/PDF-Zoland nih cun, “Tedim khuapi chung ah a um mi vialte nan umnak inn chuahtak in zaam sawh hlah u, mizapi innlo a him khawh nakhnga kan i zuam cuahmah, sungh zawtlaknak a zor khawh nakhnga kahdohnak kan ṭhumh deuh lai,” tiah mizapi sin thawngthanhnak an tuah.
Chin Ramkulh In Kum 3 Chung Ah Biaknak Lei Inn 120 Deng A Rawk>>>>>>>>
SAC nih Uknak an laak kumthum leng chung ah Chinram chungah biaknak lei inn 120 deng a rawk, tiah Chin Human Rights Organisation (CHRO) nih May 26 ah an langhter.
2021 in 2024 April thla tiangah SAC nih vanlawng in bomb kahnak, meikhanghnak le hriamngan kahnak ruang ah biakinn telh in biaknak lei inn 116, ngamdamnak lei inn 26 le sianginn 49 an rawk, tiah CHRO nih an langhter.
Hi hna lak ah a tamdeuh cu Thantlang peng chung in a si i Hakha, Falam, Kanpetlet, Mindat, Tedim le Tonzaang khua zong in an i tel ve.
Nizaan May 26 zong ah Tedim peng Mualbem khua cu SAC nih vanlawng in a kah i Khrihfa biakinn telh in inn tlawmpal a rawk, tiah theih a si.
SAC nih Chinram ah biaknak lei inn le si-inn pawl cu kah ding ah an i tinh bik mi a si, tiah CHRO nih cun an langhter.
Chinram chungin kahdohnak ruangah tualchung mi 60,000 leng India ram ah an zaam, tiah theih a si.
Kachin Ram, Waingmaw Peng Ah Y-12 SAC Vanlawng A Tla Tiah Thawngpang A Leng>>>>>>>>>
Kachin ramkulh, Waingmaw ah bomb a thlatu Y-12 SAC vanlawng pakhat cu a tla, tiah thawngpang a leng nain fehter a si rih lo kong, KIA chimnak nawlngei Colonel Nawbu nih a chim.
Y-12 SAC vanlawng hi nihin May 26 chunhnu hrawng ah Waingmaw peng, Hkatshu khua nichuah thlanglei banhla dum ah a tla tiin thawngpang a leng nain fehter ngaingai cu a si rih lo.
“Kannih zong Y-12 SAC vanlawng pakhat a tla ti mi thawng kan theih ve nain fehter awk a ṭha rih lo, an kah mi maw a si, asiloah ah a rawk mi dah a si ti kan theih lo,” tiah KIA chimnak nawlngeitu nih cun a chim.
Atu lio hi KIA le SAC ralkap pawl cu Mansi peng, Momauk peng le Waingmaw peng chung ah an i kap lio, tiah theih a si.
Leave a Reply