Myanmar ramchung ah SAC nih a bu in mi a thah hna ruang ah 2022 May 1 in 2024 May 15 tiang, kum 2 chung ah mipi 1,446 an thi cang tiah BNI-Myanmar Peace Monitor nih May 27 ah a thanh.
Minung 5 in a cunglei thahnawnnak pawl kha cazin an lak hi a si i kum 2 chung ah a bu in thahnak voi 154 tiang a cang. Cu chung ah Sagaing ramṭhen ah voi 48 in a tam bik a cang i Rakhine ram ah voi 16 nih a zulh.
Mandalay ramṭhen ah voi 14 can bantuk in Kachin, Shan, Karenni, Chin, Bago, Tanintharyi hmunhma hna zong ah a bu in thahnak a chuak tiah BNI-Myanmar Peace Monitor cazin ah hmuh khawh a si.
A bu in thahnak chung ah tlaih hnu in thahnawnnak pawl aa tel bantuk in van lei le hriamngan ruang ah thihnak zong aa tel.
2024 January in May 15 tiang a bu in thahnak voi 49 a cang i van lei kahdohnak ruang ah thihnak a tam bik a chuak.
SAC hi ramchung hmun kip ah kahdohnak a sungh thluahmah caah mipi pawl ral in hramhram thahnak a buar caah dothlennak phu lei nih mipi runven ding ṭuanvo an ngei tiah BNI-Myanmar Peace Monitor nih a langhter.
Tedim Khuapi Kahdohnak Ah Chin Hriamtlai Phu Unau Nih Nah-Tah-Lah zung, Siizung le Palik Sakhan An Laak Cang
Chinram, Tedim khuapi kahdohnak ah Chin hriamtlai phu unau nih SAC ralkap pawl umhmun an khuarnak Nah-Tah-Lah zung, siizung le palik zung an laak cang kong tualchung mi nih an chim. Tedim khuapi chung kahdohnak ah cun SAC ralkap nih vanlawng in kahdohnak an tuah i khuachung ah bomb an thlak pin ah timh ciammam tein inn an khangh i kaphnih kar kahdohnak a fak, tiah theih a si.
May 26, zan suimilam 10:00 hrawng in Chin hriamtlai phu unau nih Tedim khuapi laak ding in kahdohnak an thawk i Tedim khuapi chung SAC ralkap umhmun khuarnak Nah-Tah-Lah zung, siizung le palik zung cu an laak cang, SAC ralkap pawl nih Khah-Lah-Yah 269 ah ralkap thazaang chap in kahdohnak an pehzulh ve i vanlawng in khuapi chung ah bomb an thlak pinah nizan zanlei in inn an khangh i inn tam ngai a kaang, tiah theih a si.
“Nizan May 27, zanlei suimilam 4:00 hrawng in SAC ralkap nih inn khangh hram an thawk, vanlawng in khuapi chung ah bomb an thlak an thlak ruang ah inn a kaang mi zong a tam, kaphnih kar kahdohnak a fak ngai, khuapi laak timh kahdohnak a si caah khuapi laak khawh hlan chung cu kahdohnak a fak ko lai,” tiah thawng laaknak hrampi nih an chim.
Chin hriamtlai phu unau he naihniam in a um mi thawng laaknak hrampi nih cun, “Atu lio cu kahdohnak a fah cingling a si i kahdohnak kalpi cuahmah a si caah a dik mi thawngpang lawng thanh ding ti mi Policy a um, cu ruang ah cun dikthliar in thawngpang thanh awk a ṭha lo, kahdohnak a daih tikah Chin hriamtlai phu unau nih an ngeih mi Information Center in tlamtling tein thawng an thanh te ko lai,” tiah a chim.
Tedim khuapi chung kahdohnak ah cun Chin hriamtlai phu unau nih SAC ralkap 9 an tlaih hna i SAC ralkap thi le hliamtuar zong an tam, SAC ralkap nih an hman mi hriamnam zong tam ngai an laak. Chin hriamtlai phu unau in thi le hliam an um ve, tiah theih a si.
Leave a Reply