Nikhua tuaktannak zung nih an rak thanh cang bantuk in Bay of Bengal rili pi ah Cyclone thlichia a hran ruang ah Mizoram le Myanmar ram hmun cheukhat ah thli le ruah a faak i rawhralnak fakpi zong a chuahpi pah, theih a si.
Nizan May 27 zanlei in Mizoram hmunkip ah ruah a faak i ruah lakah thli tlawmpal aa tel. Ruah hi tuzing tiang cat loin a sur i ruahsur ruangah mincimh le thingkung a tlu mi an um caah inn le lampi a rawk mi zong an um. Aizawl khuapi pawng Hlimen le Melthum karlak lunglaknak(quarry) cu a cim i, atu thawng kan ṭial tiang ah minung 10 ruak laak an si cang. Mincimh nih a chilh mi innchungkhar 2 cu kawl cuahmah lio an si.
Aizawl khuapi ṭhiam Salem veng lei zong ah mincimh a um i, mincim nih hin inn pakhat a chilh. Inn ngeitu Pu Lalṭanpuia, a nupi Pi Lalhriatpuii le an fanu Lalkohbiki hna cu vawlei nih a chilh hna, tiah theih a si i atu thawng kan laak tiang ah kawl cuahmah lio a si rih.
Aizawl khuapi hmun dangdang zong ah vawlei cim nih lampi a phihnak an um. Ebenezer thlanmual pawng Kanaan veng, thlanmual zong a cim i thlan 30 hrawng a rawk. Cupinah Aizawl khuapi pawng ah a luang mi Tlawng tiva cu a lianh tuk caah tiva kam i a um mi Sairang khua ah ti a lian i khua mi hna zeimawzat nih inn an chuahtaak.
Pehtlaihnak a ṭhat lo caah Chinram lei thawngpang hi fiang in hlat khawh a si lo.
Aizawl le a kiangkap vawlei cim nih a chilh mi ruak 22 hmuh a si cang. Ruak hmuh rih lo mi zong an um!
Tedim Khuapi Kahdohnak Ah Chin Hriamtlai Phu Unau Nih Nah-Tah-Lah zung, Siizung le Palik Sakhan An Laak Cang>>>>>
Chinram, Tedim khuapi kahdohnak ah Chin hriamtlai phu unau nih SAC ralkap pawl umhmun an khuarnak Nah-Tah-Lah zung, siizung le palik zung an laak cang kong tualchung mi nih an chim. Tedim khuapi chung kahdohnak ah cun SAC ralkap nih vanlawng in kahdohnak an tuah i khuachung ah bomb an thlak pin ah timh ciammam tein inn an khangh i kaphnih kar kahdohnak a fak, tiah theih a si.
May 26, zan suimilam 10:00 hrawng in Chin hriamtlai phu unau nih Tedim khuapi laak ding in kahdohnak an thawk i Tedim khuapi chung SAC ralkap umhmun khuarnak Nah-Tah-Lah zung, siizung le palik zung cu an laak cang, SAC ralkap pawl nih Khah-Lah-Yah 269 ah ralkap thazaang chap in kahdohnak an pehzulh ve i vanlawng in khuapi chung ah bomb an thlak pinah nizan zanlei in inn an khangh i inn tam ngai a kaang, tiah theih a si.
“Nizan May 27, zanlei suimilam 4:00 hrawng in SAC ralkap nih inn khangh hram an thawk, vanlawng in khuapi chung ah bomb an thlak an thlak ruang ah inn a kaang mi zong a tam, kaphnih kar kahdohnak a fak ngai, khuapi laak timh kahdohnak a si caah khuapi laak khawh hlan chung cu kahdohnak a fak ko lai,” tiah thawng laaknak hrampi nih an chim.
Chin hriamtlai phu unau he naihniam in a um mi thawng laaknak hrampi nih cun, “Atu lio cu kahdohnak a fah cingling a si i kahdohnak kalpi cuahmah a si caah a dik mi thawngpang lawng thanh ding ti mi Policy a um, cu ruang ah cun dikthliar in thawngpang thanh awk a ṭha lo, kahdohnak a daih tikah Chin hriamtlai phu unau nih an ngeih mi Information Center in tlamtling tein thawng an thanh te ko lai,” tiah a chim.
Tedim khuapi chung kahdohnak ah cun Chin hriamtlai phu unau nih SAC ralkap 9 an tlaih hna i SAC ralkap thi le hliamtuar zong an tam, SAC ralkap nih an hman mi hriamnam zong tam ngai an laak. Chin hriamtlai phu unau in thi le hliam an um ve, tiah theih a si.
Leave a Reply