Nizan May 28 ah a hrang mi thli le ruah nih Bungkhua IDPs camp inn 14 le Bungkhua khuachung inn 8 a hrawh, tiah Bungkhua IDPs secretary nih The Chin Post ah a chim.
Thlichia le ruah hi May 28, zinglei suimilam 5 hrawng ah faak ngai in a hrang i Bungkhua IDPs camp inn 14 le khuachung inn 8 hna cu a cungcih le a vaam a hawh hna. Hi pinah Bungkhua hall zong a rawk, tiah thawng an kan thanh.
Bungkhua hi Thantlang peng ah ralzam(IDPs) an tam biknak hmun pakhat a si i Bungkhua IDPs camp ah hin ralzam inn 138 a um. May ni 2 lio a hrang mi thlichia le rial nih IDPs camp hi a dihlak ti awk in a rak hrawh cang.
Zarh Khat Chung Ah Chin Hriamtlai Phu Le Tualchung Hriamtlai Phu Nih Khuapi Pathum Le SAC Ralkap Sakhan 11 An Laak>>>>>>>>>>
A luancia May 18-24 tiang zarh khat chung ah Chin hriamtlai phu telh in tlangcung hriamtlai phu le tualchung hriamtlai phu nih khuapi pathum le SAC ralkap sakhan 11 an laak khawh, tiah Burma Affairs & Conflict Study(BACS) nih nizan May 28 ah an thanh.
Chin hriamtlai phu nih Chinram, Tonzaang khuapi le Cikha khuapi cu a liamcia zarh ah an laak i Rakhine ramkulh in Buthidaung khuapi cu AA le ṭangṭi phu nih an laak ve. SAC ralkap sakhan tam bik an laak khawhnak hmun cu Rakhine ramkulh ah a si i, a pahnihnak ah Kachin ramkulh chung ah a si, tiah an langhter.
1027 Operation kalpi a si hnu in khuapi laak le SAC ralkap sakhan laak kahdohnak a tam i Chinram, Rakhine le Kachin ramkulh ah a cawlcang mi tlangcung hriamtlai phu hna cu thazaang faak ngai in an cawlcang, tiah Burma Affairs & Conflict Study (BACS) nih cun an thanh.
“Kachin ralkap KIA nih Myitkyina le Bhamo cu an kulh dih i Rakhine ralkap AA zong nih Ann khuapi cu a ningpi in laak an i tim cuahmah, Rakhine ramkulh kahdohnak cu Thandwe khuapi tiang a phan cang i ramkulh luatnak an naih ngai cang,” tiah ramkhel analyst U Than Soe nih a chim.
Zarh khat chung kahdohnak ah hin Myanmar ramchung hmun kip ah kahdohnak voi 100 leng a chuak i SAC ralkap nih Chinram, Kachin, Rakhine ramkulh le a dang hmunram 5 chung ah vanlawng in kahdohnak an tuah. Kaphnih kar kahdohnak a fah caah tualchung mi chung in thah a tong mi zong an um i, kum tling lo ngakchia 4 telh in tualchung mi 46 nunnak a liam, tiah Burma Affairs & Conflict Study (BACS) nih cathanh an chuah mi ah an langhter.
Vawlei Minh Ruangah Aizawl Khuapi Le A Kiangkap Ah Minung 33 An Thi
Nizan Aizawl khuapi le a kiangkap ruah sur ruang i minhcimhnak a chuak mi ah a thi mi cu 33 an si i, nizan tiang ah ruak 25 hmuh a si. Nihin ah ruak hi kawl rih a si.
Cozah lei in siseh, YMA le tualchung mi hna cu ruak kawl le bawmhchanhnak tuah ding in an chuak hna i, vawlei a minhnak hmun kip ah ram CM Pu Laldihoma telin hruaitu cheukhat zong an kal. Mithi lakah ah hin miphun dang Kala zong zeimawzat an i tel, tiah theih a si.
Nunnak a liam mi 33 hi nizan May 28, minhcimh a chuahnak Aizawl le a kiangkap hmun 6; Melthum, Hlimen, Salem veng, Falkawn, Kelsih le Lungsei ah a thi mi an si.
Hlimen lunglaknak(quarry) hmun minhnak ah hin a thi mi an tam bik i, nizan tiang ah ruak 13 an hmuh. Minhcimh nih hin umnak inn a laak caah tutan a thi mi hi a chungkhar in a thi mi zong an um. Salem veng i a thi mi zong hi inkhat khuasa, chungkhar pakhat an si.
Leave a Reply