Chin ramkulh, Matupi khua um SAC pengkomh zung cu CDF-Matupi Battalion 2 nih an lak tiah thawng theih a si.
May 30 zinglei ah pengkomh zung cu kahdoh an thawk i zinglei sml 10:00am hrawng ah pengkomh zung cu CDF-Matupi Battalion 2 (Vakok Battalion) nih an lak khawh hi a si tiah Matupi Times nih a langhter.
Kahdohnak chung in SAC lei a thi le hliam tuar theih a si rih lo nain pengkomh zung in Phanai phungki sianginn lei ah SAC ralkap pawl an zaam i CDF-Matupi (Vakok Battalion) lei hriamtlai 1 bomrap aa lamh sual caah hliam a tuar tiah theih a si.
Hriam lak khawh mi kong he pehtlai in thawng tling tein kan thanh te lai tiah Vakok Battalion in ṭuanvo ngeitu nih Kimo Media ah a chim fawn.
Kaladan Tivapi A Lianh Ruang Ah Chin Ralzaam Umnak Inn 10 Hrawng A Rawk>>>>>>>
India ram, Mizoram ramkulh, Lawngtlai pengkomh, Kaki khua ah May 28 ni ah Cyclone Remal thlichia hrang in ruah faak ngai a sur i Kaladan tivapi a lianh ruang ah tivapi kam ah ralzaam in aa dor mi Chin ralzaam umnak inn 10 hrawng a rawk. Ralzaam pawl cu a himnak hmun ah an ṭhialter hna, tiah theih a si.
“May 28 chun ah ralzaam pawl cu ṭhialter an si i minung aa hliam mi an um lo, atu i aa ṭhialkam mi hi ṭuan chom ei chom in a nung mi an si hna i zualral in bawmhnak an herh ngai, cun an i dornak ding ca ah Tarpaulin tibantuk zong an herh hna,” tiah Paletwa peng IDPs camp ṭuanvo ngei U Soe Than nih a chim.
Kaki khua ralzaam Camp ah cun chungkhar 105 in minung 400 leng an um i ni khat hnu ni khat in ralzaam an karh, cu pin ah a luancia ni tlawmpal chung ah chungtlik zawtnak in minung 20 hrawng a zaw i zualral in sii-ai bawmhchanh an herh kong U Soe Than nih cun a chim.
SAC ralkap nih hramhram in nawlngeihnak an laak hnu in, Chinram in Mizoram ramkulh chung ah a zaam mi 34,000 leng an um i, cu chung ah Chin ralzaam 3,500 leng cu Lawngtlai pengkomh ah an i dor hna, tiah theih a si.
Thlichia Nih Bungkhua Inn 8 le IDPs Camp Inn 14 A Hrawh>>>>>>>
Nizan May 28 ah a hrang mi thli le ruah nih Bungkhua IDPs camp inn 14 le Bungkhua khuachung inn 8 a hrawh, tiah Bungkhua IDPs secretary nih The Chin Post ah a chim.
Thlichia le ruah hi May 28, zinglei suimilam 5 hrawng ah faak ngai in a hrang i Bungkhua IDPs camp inn 14 le khuachung inn 8 hna cu a cungcih le a vaam a hawh hna. Hi pinah Bungkhua hall zong a rawk, tiah thawng an kan thanh.
Bungkhua hi Thantlang peng ah ralzam(IDPs) an tam biknak hmun pakhat a si i Bungkhua IDPs camp ah hin ralzam inn 138 a um. May ni 2 lio a hrang mi thlichia le rial nih IDPs camp hi a dihlak ti awk in a rak hrawh cang.
Chinram Chung Ah Ngunkhuai Laak Ningcang Cu Chinland Parliament Nih An Suaisam>>>>>>
Chinram chung ah a dik mi ngunkhuai laak ningcang cu Chinland Parliament phungphai lei tlaitu Committee nih an suaisam kong Chinland Parliament in ṭuanvo ngeitu nih an chim.
Chinland Parliament, phungphai lei tlaitu Committee chungtel 18 nih a luancia May 13-17 tiang ni 5 chung ah Chinram chung ah a dik mi le aa khat dih mi ngunkhuai laak ningcang cu an suaisam, tiah theih a si.
Hi kong he pehtlai in Chinland Parliament Chairman Pu Hung Naing nih cun, “Peng kip le hmunram kip nih an ngeih mi zulhphung tete khawmhsuat dih a si, hmunram pakhat le pakhat i khat dih ding in ngunkhuai laak ding in timhlamh a si, hmunram cheukhat ah ngunkhuai laak a tlawm i hmunram cheukhat ah a tam kho, phung fek tein ser a si ahcun Chinram cozah nih a ṭha bik le aa khat dih in tuah a tuah khawh lai,” tiah a chim.
“Ngunkhuai kong ah a fekfuan mi phung a um lo caah cozah nih ngunkhuai a la kho lo i fek tein phung ser hnu cun peng kip, hmunram kip le Chinram cozah cu pehtlaihnak ṭha an ngeih cang lai, Chinram cozah sin ah aa fonh rih lo mi hmunram chung belte ah cun ngunkhuai laak a rem rih lai lo,” tiah Pu Hung Naing nih cun a chim.
A voi khatnak ngunkhuai laak kong phung an suaisamnak ah cun ngunkhuai kong lawng si lo in rianṭuantu phu nih Register tuah an duh tik ah Register tuah ningcang phung zong an suaisam chih i, register tuah tik ah cozah a si lo mi NGO le INGO nih Chinmi bawmhchanh an duh hna ah bawmchantu a si lai ti ruahchannak he tuah an timh, tiah theih a si.
Leave a Reply