Myaing Peng Ah Van Ral Vennak Caah Bomkhor An Co Hna>>>>>>>>

Magway ramṭhen, Myingyan peng ah SAC van ral vennak caah innkhat nih bomkhor pakhat cio an co hna tiah theih a si.
Hramhram in uknak a latu SAC nih kahdohnak um lo pi in khuate pawl ah van lei kahdohnak a tuah lengmang caah Myaing peng chung um khuate pawl nih innkhat ah bomkhor pakhat cio an cawh ding cawlcanghnak an tuah tiah MVRF nih a thanh.
Khuate kip inn lawng siloin sianginn zong ah a luancia kum in bomkhor an co cang hna tiah theih a si.

Chinland Defense Force – Hualngoram Nih A Voi Nganak Basic Military Training Tlamtling Tein An Lim>>>>>>>>

Chinland Defense Force – Hualngoram nih a voi nganak Basic Military Training cu tluang tein an lim i nihin May 30 ah training lim lawmhnak tlamtling tein an tuah kong, CDF-Hualngoram nih nihin ah an thanh.
Chinland Defense Force – Hualngoram nih a voi nganak Basic Military Training an tuah mi ah cun ralkap 38 nih tlamtling tein training an lim i Pathian sin lunglawmh biachim thlacamnak he caan an hmang, tiah theih a si.
“A voi nganak Basic Military Training cu tluang tein kan dih kho, Pathian nih ram dawtu ralkap thar a kan pek chap caah Bawipa sin ah lawmh bia kan chim, training dih lawmhnak ah caan hmang ding in sawm mi le aa tel kho mi nan zate cung ah kan i lawm tuk hringhran,” tiah CDF-Hualngoram nih an langhter.

Tonzaang Le Cikha Khuapi Kahdohnak In A Tlung Mi CDF-Thantlang Ralkap Hna Ca Ah Thlacamnak An Tuah>>>>

Chinram, Tonzaang le Cikha khuapi kahdohnak in a tlung mi Chinland Defense Force – Thantlang ralkap hna cu thlacamnak an tuahpiak hna i Pathian sin lunglawmh thlacamnak in caan an hman kong, CDF-Thantlang nih nihin May 30 ah an thanh.
A luancia April 27 ni in a rak chuak i Tonzaang le Cikha khuapi kahdohnak ah i tel in a kir ṭhan mi CDF-Thantlang ralkap hna le inn ah a rak um mi ralkap hna lunglawm tein an i ton khawh ṭhan caah Pathian sin ah lawmh biachim in thlacamnak an ngeih kong le ram le miphun ca ah nunnak a pe mi CDF-Thantlang pasaṭha hna upat peknak in caan an hman kong cu CDF-Thantlang nih an langhter.
Tonzaang khuapi kahdohnak ah cun CDF-Thantlang telh in CNA hruai mi Chin hriamtlai ṭangṭi phu hna an i tel i Tonzaang khuapi lawng si lo in Cikha khuapi zong an rak laak chih, cu kahdohnak ah cun SAC ralkap 20 leng an thi i minung 40 leng an tlaih hna. Ṭangṭi phu nih SAC ralkap hriamnam tam ngai an laak pin ah tangka Kyats sing 5,000 leng an laak. Chin hriamtlai ṭangṭi phu in hliamtuar an um i CDF-Thantlang ralkap pathum telh in ṭangṭi phu in ralkap cheukhat nih ram le miphun ca ah an nunnak an pek ve.