Mizoram, Aizawl khuapi le a kiangkap vawlei minh ruangah harnak a tong mi hna bawmchantu Young Mizo Association (YMA) sin ah Myanmar ralzaam hna aiawh in Network for Unity Association (NUA) nih ₹ 35,000 an bawmh hna, tiah theih a si.
Vawlei minh ruang ah Aizawl khuapi le a pawngkam Hlimen le Melthum sang hna ah minung thi le tlau an tam i, bawmhchanhnak rian a ṭuantu YMA sinah bawmhnak phaisa hi NUA nih an pek pinah minung thazaang zong in an bawmh hna kong NUA nih an langhter.
May 28 ah a cang mi vawlei min ruangah hin miphun dang telh in minung 33 an thi i May 30 zanlei tiang ah ruak 28 an chuah khawh cang. Thlaruk ngakchia telhin mi panga cu an kawl cuahmah rih hna, tiah theih a si.
Matupi Khuapi Pengkomh Zung Cu CDF-Matupi, Brigade-2, Vakok Battalion Nih An Laak>>>>
Chinram, Matupi khuapi penguk zung ah umhmun a khuar mi SAC ralkap pawl cu CDF-Matupi, Brigade-2, Vakok Battalion nih nihin zinglei ah an kah hna i penguk zung cu a ningpi in an laak khawh, tiah theih a si.
Nihin May 30 zinglei ah Matupi khuapi chung penguk zung ah umhmun a khuar mi SAC ralkap pawl cu CDF-Matupi, Brigade-2, Vakok Battalion(Battalion 2) nih an kah hna i, zinglei suimilam 10:00 hrawng ah penguk zung a ningpi in an laak kong, Vakok Battalion in chimnak nawlngeitu nih a chim.
“A hlan ah kan rak suaisam cang bantukin kan uk mi hmunram chung ah a um mi SAC ralkap sakhan vialte laak dih kan i timh caah a voi khatnak kan tlamtlinh i pehzulh in kahdohnak kan kalpi lai i a taang rih mi SAC ralkap sakhan zong laak kan i tim,” tiah Vakok Battalion in chimnak nawlngeitu nih cun a chim.
Matupi pengkomh zung kahdohnak ah cun CDF-Matupi, Vakok Battalion in ralkap pakhat leiphum mi bomb aa lamhsual ruang ah hliam a tuar i, SAC ralkap lei thi le hliamtuar zat fehter a si rih lo.
Matupi–Hakha lampi cung ah a um mi Matupi penguk zung chung ah caan saupi umhmun a khuar cang mi SAC ralkap pawl cu zung dang ah an i ṭhial hnu in Phaneng khua lei ah an zaam i CDF-Matupi, Brigade-2, Battalion 2 nih dawi in an kah hna, tiah theih a si.
“Pehzulh in kahdohnak kalpi kan timh i kan uk mi hmunram chung ah a um mi SAC ralkap sakhan vialte laak dih kan timh caah mizapi nih pehzul in rak kan dirkamh in rak kan bawm rih ko u, cun ralrin kan i pek mi tete zong nawlngai tein rak kan zulhpiak hram u,” tiah Vakok Battalion in chimnak nawlngeitu nih a chim.
Tonzaang Khuapi Kahdohnak In A Tlung Mi CDF-Hualngoram Ralkap Hna Ca Ah Thlacamnak An Tuah>>>>>>
Chinram, Tonzaang khuapi kahdohnak in a tlung mi Chinland Defense Force – Hualngoram ralkap hna cu thlacamnak an tuahpiak hna i Pathian sin lunglawmh thlacamnak in caan an hman kong, CDF-Hualngoram nih nihin May 30 ah an thanh.
A luancia May 4 ni in a rak chuak i Tonzaang khuapi kahdohnak ah aa tel i a kir ṭhan mi CDF-Hualngoram ralkap hna le inn ah a rak um mi ralkap hna lunglawm tein an i ton khawh ṭhan caah Pathian sin ah lawmh biachim in thlacamnak an ngeih kong cu CDF-Hualngoram nih an langhter.
Tonzaang khuapi kahdohnak ah cun CDF-Hualngoram telh in CNA hruai mi Chin hriamtlai ṭangṭi phu hna an i tel i Tonzaang khuapi lawng si lo in Cikha khuapi zong an rak laak chih, cu kahdohnak ah cun SAC ralkap 20 leng an thi i minung 40 leng an tlaih hna. Ṭangṭi phu nih SAC ralkap hriamnam tam ngai an laak pin ah tangka Kyats sing 5,000 leng an laak. Chin hriamtlai ṭangṭi phu in hliamtuar an um i CDF-Hualngoram ralkap pakhat telh in ṭangṭi phu in ralkap cheukhat nih ram le miphun ca ah an nunnak an pek ve.
Leave a Reply