Sittwe Peng, Byinephyu Khua Mi 41 Cu SAC Ralkap Nih An Thah Hna>>>>>>

Rakhine ramkulh, Sittwe peng, Byinephyu khua ah nu le ngakchia telh in tualchung mi cu a luancia May 29 ni ah rallam a sial mi SAC ralkap 100 hrawng nih an rak tlaih hna i nihin June 1 ah pa 41 an thah hna, an ruak belte hmuh a si rih lo, tiah tualchung mi nih an chim.
“Byinephyu khua ah nu le ngakchia, tarnu tarpa cu motor in an kalpi hna i Sittwe khuapi ah an chiah hna, pa tu cu an thlah hna lo i nihin i thawngpang kan don ning ah cun minung 41 an thah cang hna, an ruak belte cu khoika an chiah kan thei lo, cheukhat nih cun khuachung ah an hlonh sawh an ti,” tiah thawng laaknak hrampi pakhat nih a chim.

“A luancia May 29 ni ah minung 4 hrawng, May 30 ni ah minung 10 le nizan May 31 ni ah minung 27 tiin a bu in SAC ralkap nih an thah hna,” tiah thawng laaknak hrampi pakhat nih cun a chim.
Byinephyu khua a lut mi ah cun Daw Saw Mya Yaza Lin hruai mi Arakan Libration Party(ALP/ALA) ralkap zong an i tel i SAC ralkap nih a bu in tualchung mi an thah hna lio zong ah ALP/ALA ralkap nih an bawmh hna, cu pin ah tlaih a tong mi chung in mino cheukhat cu

SAC ralkap nih ralkap tla ding ah an motor in an kalpi hna, tiah thawng laaknak hrampi nih an chim.
Nikum 2023 lio zong ah rallam a sial mi SAC ralkap pawl cu Byinephyu khua ah lut in chekhlatnak an rak tuah i tualchung mi cu a bu in an rak thah hna, tiah theih a si.

Thantlang Peng, Thau Khua Ah Ralzaam In Aa Dor Mi Tlangval Pakhat Ti Ah A Paam>>>>>>>

Chinram, Thantlang peng, Thau khua ah ralzaam in aa dor mi tlangval pakhat cu tiva a kalnak ah ti ah a paam, tiah theih a si.
Thantlang khuapi, TABC sang ah a rak um mi Pu Ceu Tling le Pi Sui Li Par hna i an fapa Vl. Isak cu sur vorh ding in Hri-awh tiva an kalnak ah ti ah i chuahsual in nihin June 1 ah a nunnak a liam, tiah theih a si.

Hri-awh tiva ah a paam mi Vl. Isak cu ram a buai hlan ah Thantlang khuapi, TABC sang ah khuasa in Thantlang Baptist Church(TBC) chungtel mino pakhat a si i, ram a buai hnu ah Thantlang peng, Thau khua ah a chungle he an i dor, tiah theih a si.
A luancia May 16 ni ah Thantlang peng, Hriangkhan khua ah ralzaam in aa dor mi TBC chungtel ṭhiamṭhiam Pu Nam Hmung fapa Pu Hlawn Ceu Bik(kum 27) zong Lungmili ah sur a vorhnak ah i chuahsual in a nunnak a rak liam ve.