CNDF ah Intelligence Director rian a ṭuan mi Salai Van Lian Sang@Obed (kum 45) cu damlonak ruang ah mual a liam, tiah CNDF nih thawngthanhnak le ngaihchiatpinak ca a ṭial.
“Amah Salai Van Lian Sang pumpak nih bia aa kam bantuk in ram le miphun dohthlennak rian a ṭuan cuahmah lio May 27 ah khan thin lei damlonak in a kan liamtak,” tiah an langhter.
“Miphun dothlengnak ca ah a pum aa peknak cung ah CNO/CNDF in upatnak sang bik kan pek i, tantak mi chungkhar kan ngaihchiatpi hna,” tiah ngaihchiatpinak zong an langhter.
Salai Van Lian Sang hi SAC ralkap nih Myanmar ram uknak an laak thawk in Falam khuachung lamzawhnak ah hruaitu pakhat zong a rak si i, hriam tlaih in dohthlennak a hun chuah tik zong ah CNDF Intelligent Director a ṭuan mi a si.
Sagaing ramṭhen, Myingin peng chung ah SAC nih nihin (June 3) ah van lei in bom a thlak caah a tlawmbik minung 20 leng an thi tiah The Nation Voice nih a langhter.
Mingin peng, Mataw khuate ah an tuah mi ṭhitumnak puai ah SAC nih vanlawng in bom a thlak caah a tlawm bik minung 20 leng an thih hi a si tiah theih a si.
“Ṭhitumnak puai ah a thlak tiah kan theih. A fiang in zeihmanh kan thei kho rih lo. A thi mi 20 leng an si ti lawng kan theih rih. A kutke a bul mi zong an um tiah kan theih” tiah People Defense Force – Taung Dwin Region-Mingin chungtel 1 nih The Nation Voice ah a chim.
Atu hi van lei kahdohnak ruang ah a thi mi ruak pawl an char lio a si i 20 leng an char cang hna tiah theih a si.
Maṭaw khua ah an tuah mi ṭhitumnak puai hi dothlennak phu pawl nih an tuah mi a si tiah SAC ralkap lei thawngzamh pawl nih cun an thlah ve.
CNO/CNDF Sin Ah Palek 2 CDM A Tuah>>>>>>
Chin ramkulh, Falam khua hrambunh hriamtlai a si mi CNO/CNDF sin ah palek 2 cu May 31 ah CDM a tuah tiah theih a si.
Hriam he CDM a tuah mi palek Hein Htet San cu CNO/CNDF sin ah hriam he CDM a tuah hi a si i CNO/CNDF nih tangka sing (60) laksawng an pek, palek Hau Khant Sein zong tangka sing 10 laksawng an pek ve tiah theih a si.
Leave a Reply