Sagaing ramṭhen, Mingin peng, Mataw khua ah ṭhitumhnak an tuah lio, tuzing suimilam 8:00 hrawng ah SAC ralkap nih vanlawng in bomb an thlak ruang ah tualchung mi 21 an thi i, minung 40 leng hliam an tuar, tiah theih a si.
“SAC ralkap vanlawng bomb thlaknak ah hin nu le ngakchia a thi mi an tam, bomb lung thum an thlak mi ah lung khat lawng a puak i pahnih tu cu a tlolh, thi le hliamtuar an tam ngaingai, a ke a bul mi ngakchia an tam i a cheu cu an el in a bul, bomb an thlak hnu in rallam sial colh phun cu um dawh a si lo, thi le hliamtuar an fimhlawm colh hna,” tiah tualchung hriamtlai phu chungtel pakhat nih a chim.
“SAC ralkap nih vanlawng in bomb an thlak pin ah Drone in kahdohnak an tuah caah thi le hliamtuar zat fehter awk a ṭha rih lo, hi bantukin SAC ralkap nih kahdohnak an tuah cu Dalan nih thawng an pek hna ruang ah a si ko, atu zong hi thawng fiang an theih ruang ah Magway in an hung kainak a si,” tiah tualchung hriamtlai phu ralkap pakhat nih cun a chim.
A liamcia 2023 April 11 lio zong ah Kanbalu peng, Pazigyi khua ah tuah mi NUG zung honnak ah SAC ralkap nih vanlawng in bomb an thlak ruang ah nu le ngakchia telh in tualchung mi 80 leng an rak thi, tiah theih a si.
MTC/MDF Le IMC/CDF-Mara I Fonh Ding In Kaphnih Hnatlaknak Ngei In Minsen An Thut Cang>>>>>>>
Mara hriamtlai phu hnih MTC/MDF le IMC/CDF-Mara cu Mara Evangelical Church(MEC) tawlrelnak in mah le mah an i kahdoh tawn mi ngol in remdaihnak he i fonh ding in kaphnih hnatlaknak an ngeih i minsen an thut kong, Maraland Territorial Council(MTC) nih nihin June 3 ah an thanh.
Mara Evangelical Church(MEC) remdaihnak sertu Committee tawlrelpinak in MTC/MDF le IMC/CDF-Mara cu mah le mah i kap ti lo ding in hnatlaknak an ngei i minsen an thut mi kong ah Re-Unification Committee dirh in palai thimnak le fehternak an ngeih kong, Maraland Territorial Council(MTC) nih cun an langhter.
Maraland Territorial Council(MTC) nih aa tinh mi cu Mara phun lungrualnak cu biapi bik ah chia in zapi a himnak hmun ah umter le mah le mah kar ah remdaihnak ser in hmunkhat ah i fonh ding hi a si, tiah MTC nih an thanh mi ah an langhter.
A luancia June 1 ni ah tuah mi a voi hnihnak Mara Council tonbiaruahnak ah cun ramchung ramleng Council chungtel, zatlang ukhruaitu phu in chungtel, Maraland Defense Force(MDF) chungtel, Central in biaceihtu phu le ruahnak petu tiin palai 37 an i tel kho, tiah MTC nih an thanh mi ah cun an langhter chih.
CDF-Hakha Nih Kahdohnak Kong He Pehtlai In Thawngthanhnak An Tuah>>>>>>>
Chinland Council nih a kalpi mi Tonzaang le Cikha khuapi kahdohnak Operation Exodus ah CDF-Hakha cu an i tel i, kahdohnak ah CDF-Hakha chungtel Salai Peng Tu Thang le Salai Van Duh Peng nih nunnak an pek.
A luancia May 18, 20 le 30 ah khan Operation Exodus bawmhnak caah Rung Operation cu Hakha khuachung ah CDF-Hakha nih an tuah i, SAC lei pahnih hmunril ah an fim hna pinah pahnih an hliamh hna kong CDF-Hakha nih an thanh.
Cupinah June 1 ah Hakha khuachung, luatnak lungphun ah hmun a khuar mi SAC ralkap hna cu bomb voi hnih an thlak hna i Lamrukton le Cawbuk Gate zong ah kahdohnak an tuah. SAC lei khawnden kong ah thawngfiang theih a si lo.
Operation Exodus ah nunnak a liam mi CDF-Hakha ralkap pahnih cu upatpeknak an langhter i, “Ralhrang hriamtlai hna zong CDM tuah khawh a si, lunglawm tein kan in don hna,” tiah CDF-Hakha nih SAC hriamtlai hna cu CDM tuah ding in an sawm hna.
Falam Khuapi Um Palik Sergeant Pakhat Telh In SAC Palik Pathum Cu CNO/CNDF Sin Ah An I Ap>>>>>>>
Chinram, Falam khuapi ah a um mi SAC kuttang palik sergeant pakhat telh in palik pathum cu hriamnam i put in CNO/CNDF sin ah an i ap kong CNO nih an thanh.
A luancia May 31 ni ah Falam khuapi chung ah um in SAC kuttang ah rian a ṭuan cuahmah mi palik Sergeant Pu San Thawng(pumpak no.1352/80), a kuttang um Hein Htet Sang(pumpak no. Lah/291986) le Hua Khant Sein(pumpak no. Lah/281112) hna cu hriamnam i put in CNO sin ah an i ap, tiah CNO nih cun an thanh.
Chin National Organization(CNO) sin ah aa ap mi SAC palik Hein Htet San nih G3 meithat pakhat, H. Gernades kutcheh bomb lung 4, 7.62 kuan 185, kuanbawm pathum aa put caah CNO nih Kyats sing 60 an pek i palik Hua Khant Sein nih kutcheh bomb pahnih le 7.62 kuanfang 105 aa put caah Kyats sing 10 an pek ve. CNO sinah aa ap mi hna cu a himnak hmun ah an kuat hna kong, CNO nih an thanh mi ah an langhter.
Leave a Reply