Chin ramkulh milu a cheu hrawng a si mi, mipi sing 2 le cheu hrawng cu kahdohnak le buainak ruang ah ramchung le a pawngkam ram hna ah an zaam i bawmhnak zong an hmuh lo caah an harsa ngaingai hna tiah CHRO nih June 3 ah cathanh a chuah.
Hramhram in uknak lak a si hlan ah milu sing 5 hrawng umnak Chin ram cu hramhram in uknak lak a si hnu kum 3 chung ah sing 2 le cheu hrawng hi ralzaam dirhmun an phan hna tiah theih a si. Ralzaam dirhmun a phan mi hna cu ramchung le India ram hna ah IDP dirhmun in, innlo ngei lo tein an i dor hna caah an harsa hringhran tiah CHRO nih a thanh.
Atulio kahdoh a chuahnak Tedim khuachung mipi hna telh in Tonzang, Cikha lei mipi hna zong an zaam caah eidin lei an harsa hringhran tiah theih a si.
2020 lio Chin ramkulh cozah nih a thanh ning ah, Chin ramkulh ah inn 96,696 a um i milu 52,0032 an um tiah theih a si.
SAC Nih Facebook, Instagram, WhatApp Le X (Twitter) Phih An Timh, Anmah Ser Mi Myspace Cu Mipi Hman Khawh Dingin An I Zuam Cuahmah>>>>>>
Myanmar ah VPN in Facebook hmannak cu May 30 ah SAC nih an phih. Hi VPN phihnak ah hruaitu cu pehtlaihnak (settuaizi) vuanci changtu Brigadier General Lu Mon a si i Colonel Thiha Min Thun, Mascots Company in Dr. Win Kyaw le China thiamsang hna an i bawm tiah theih a si. VPN phihnak ah Secure Web Gateway (SWG) an hman.
VPN phihnak ah ṭuanvo latu company cu Mascots Technologies & Telecommunication a si. MTT company ngeitu Dr. Win Kyaw cu Burbrit Beer company dirhtu pakhat a si pin ah sakremhnak (construction) company le sii company ngeitu a si. Min Aung Hlaing chungkhar he naihniam ngai in a um mi a si fawn.
Mascots Technologies & Telecommunication nih VPN phihnak rian (SWG project) a hmuh in Rangoon ah Mynet ti mi min in Internet Service an tuah. Cun Media Tree company min zongin rian an ṭuan fawn.
SAC nih VPN an phihnak a ruang cu Myanmar ah Facebook, Instagram, WhatsApp le အပါအဝင် Twitter@ X kha phih dih an duh caah a si.
VPN phihnak ah a bik in bawmtu cu China a si i Mascots Technologies & Telecommunication China in thiamsang le engineer 13 a cah hna. SAC nih tuante in VPN hi phih a timh ko nain an hlawhtling lo i May 30 lawng ah khan an hlawhtling. Cu zong cu a dihlak cu a phit kho rih lo.
February 12 ah khan VPN phihnak hriamnam Secure Web Gateway cu Install an tuah cang nain an herh mi thilri a phak lo caah ralkap ni (Tatmadaw Neh) March 27 ah ah thawk ding an ti ṭhan i thilri a phak hlei lo caah May 30 lawngah an thawk khawh hi a si.
Atu hi VPN an phih mi a thawk nak lawng a si caah an phih khawh lo mi a tampi rih. Asinain SAC nih Myanmar ah VPN vialte phih dih an i tim. VPN hi an duhning in an phih dih khawh taktak ahcun Facebook hman khawh a si ti lai lo. SAC nih Facebook ai ah Myspace ti mi application an ser cuahmah i VPN an phih dih khawh ahcun Myspace kha mipi an hmanter hna lai.
Leave a Reply