Paletwa peng ah AA nih thilṭhalo an tuah mi kongah Global Khumi Organization (GKO) nih cun duhlonak cathanh an chuah i zeibantuk Chin hriamtlai phu hna hmanh AA he pehtlaihnak ngeih lo dingin nawlnak an tuahchih fawn.
Paletwa peng ah Khumi miphun hi zatuak 60 an um. Chin phunṭeng dang he Chin miphun dihlak zatuak 80 an si i Rakhine miphun zatuak 20 an um ve. AA hi 2015 in Paletwa ah an lut i Kawl ralkap he an i kap. AA ralkap hna nih cun Paletwa mipi cung ah sualnak le thilṭhalo tampi an tuah. Kawl ralkap hna nak hmanh in AA ralkap tuahsernak cu a zual deuh tiah GKO nih an cathanh ah an langhter.
Cu an cathanh chung ah cun AA nih nu cheukhat, khuabawi le hlutdaw palai hna cu a ruang um loin an tlaih, an hrem hna i cheukhat kutke tlamtlinglo ah an cang, nunnak a liam mi zong an um tiah an ṭial. Cu lawng si loin Bangladesh ah a um mi Rakhine miphun hna cu Paletwa ah tampi an luhter hna i inntek a si mi Chin miphun hna tu cu Paletwa chuahtak in an zaam chin lengmang. Cucaah hihi miphun pakhat cungah sualnak nganpi tuah (crime against humanity) le miphun cihmih (genocide) phunkhat a si tiah an langhter fawn.
AA nih Paletwa an luh thawk in sii ṭhalo (drug) an zuar ruangah Paletwa peng mino tampi sii ṭhalo an tawng. Cu pin ah kum 15 a tling rih lo mi tiangin AA ah lut dingin an dawh hna caah mino tampi Mizoram ah an zaam. AA nih Paletwa peng ah an tuah mi sualnak le thilṭhalo vialte ngol dingin GKO nih cun AA sinah nawlnak an tuah pin ah zeibantuk Chin hriamtlai phu hna hmanh AA he pehtlaihnak ngeih lo dingin nawlnak an tuah fawn.
Tedim Khuapi Ah Kahdohnak A Chuak Ṭhan I SAC Ralkap Nih Inn An Khangh Chap>>>>>>>
Chinram, Tedim khuapi ah nihin June 4, zinglei ah kahdohnak thawng theih a si i SAC ralkap nih hriamngan zong an hman, zinglei suimilam 10:00 hrawng ah Tedim khuapi chung Luaibual sang KBZ Bank pawng hrawng ah SAC ralkap nih inn an khangh chap kong, Tedim khuapi pawng ralzaam mi nih an chim.
Tedim khuapi chung kahdohnak cu zarh khat leng a rau cang i tualchung mi 13,000 hrawng cu a himnak hmun kawl in ral an zaam, SAC ralkap nih khuapi chung ah inn an khangh i a luancia May 27 in nihin June 4 tiang ah inn 50 leng a ciam cang, cun kahdohnak ruang ah tualchung mi 4 an thi i minung 10 hrawng hliam an tuar, tiah theih a si.
Data for Myanmar nih an khawmh mi cazin ning ah SAC ralkap nih hramhram in nawlngeihnak an laak kum thum leng chung ah Myanmar ram hmun kip ah SAC ralkap nih inn 88,373 an khangh cang.
Chinram In Minung 250,000 Hrawng Kahdohnak Ruang Ah Ral An Zaam>>>>>>>
Chinram in milu zatceo tluk minung 250,000 hrawng cu kahdohnak ruang ah innlo chuahtak in ral an zaam hna i minung hawi cung zawnruahnak he bawmhnak an herh kong, Chin Human Rights Organization(CHRO) nih an langhter.
A liamcia 2019 kum i penguk zung nih an rak khawmh mi cazin ning ah Chinram ah milu sing 5 hrawng an um i ram a buai hnu ah minung 250,000 hrawng nih innlo an chuahtak, a cheu cu India ram ah ah ralzaam in an i dor hna. Chin ralzaam pawl cu minung hawi cung zawnruahnak he bawmhchannak tlamtling in an hmuh lo caah harsa ngaiin an um hna, tiah CHRO nih cun an thanh.
A luancia May thla chung kahdohnak ruang ah Chinram, Tonzaang khuapi le Tedim khuapi in tualchung mi 20,000 leng an zaam i bawmhchanh an herh ngaingai, tiah ralzaam hartong bawmchantu pakhat nih a chim.
“Tonzaang i a um mi kha Tedim ah an zaam nain Tedim ah kahdohnak a chuak ṭhan i Tedim le Tonzaang um tualchung mi tam deuh cu Kalaymyo ah an zaam. Ramri i a zaam mi zong an um ve, a biapi in umnak an herh bik cio, cheukhat cu chungkhar hnih, chungkhar thum hna in an i fonh i eidin tirawl le sii-ai an herh ngaingai hna,” tiah ralzaam hartong bawmchantu pakhat nih a chim.
United Nations Office for the Coordination of Humanitarian Affairs (UNOCHA) nih an langhter mi cazin ning ah Myanmar ram hmun kip ah innlo chuahtak in ral a zaam mi nuai 3 leng an si.
Chinland Defense Force – Thantlang Training Tuahnak Ca Ah Lai Par Dawh Chungkhar Nih Bawmhnak An Pek>>>>>
Chinram, Thantlang peng ah hrambunh mi Chinland Defense Force – Thantlang training tuahnak ca ah Lai Par Dawh nih nizan June 3 ah bawmhnak an pek mi cu tlamtling tein an hmuh kong, CDF-Thantlang nih nihin June 4 ah an langhter.
“Lai Par Dawh nih Chinland Defense Force – Thantlang training tuahnak ca ah tangka Rs 80,000 nan kan bawmh mi cu June 3 ni ah tlamtling tein kan hmuh, nan kan dirkamhnak cung ah kan i lawm tuk,” tiah CDF-Thantlang nih Lai Par Dawh chungkhar sin ah an lunglawmhnak bia an chim.
Lai Par Dawh cu a liamcia 2012/13 kum ah ram kip um Thantlang khuapi ah sianginn rak kaiṭi mi hawikom rual nih an rak dirh mi a si i Thantlang ngakṭah PCH le MFOC bawmhchanh cu i hmaithlak in Thantlang khuapi chung ah biatak tein a cawlcang mi an si. Cu pin ah siizung, siikhan ah a um mi mizaw hna va zoh in bawmhnak tete an pek tawn, sianginn kai a duh ko nain chungkhar lei harsatnak ruang ah lungrethei in a um mi zong sianginn an kai khawh nakhnga bawmhnak pek in sianginn an rak kaiter hna i Thantlang khuapi chung ah biatak tein rian a rak ṭuan mi an si.
Leave a Reply