Chinram, Matupi khuapi um tualchung mi 3,000 leng cu innlo chuahtak in an zaam hna i SAC ralkap nih khuapi chung chawdawr an boh hna i an duh mi thil paoh an laak, tiah theih a si.
Chinland Defense Force – Matupi, Brigade 1 le Brigade 2 nih a luancia May 20 in June 5 tiang caan an pek hna i khuapi um tualchung mi cu zaam ding in ralrin an pek hna hnu ah minung 3,000 leng khuapi chuahtak in an zaam, tiah theih a si.
Matupi khuapi in a zaam mi tualchung mi cheukhat cu a kiangkap khuate ah an zaam i a cheu cu India ram, Mizoram ramkulh ah motor le motorcycle i hlan in an zaam hna, tiah theih a si.
“Khuapi chung ah minung an tlawm ngai cang i SAC ralkap lei zong nih zaam ding in an fial hna. Kanmah kan um lio ah cun dawr ngan deuh mi ah a um mi paoh an laak i sakhan ah an i kalpi,” tiah ralzaam pakhat nih a chim.
Khah-Lah-Yah 304 le Khah-Lah-Yah 140 Byuha sakhan kar ah a um mi Matupi khuapi cu a kaang ve ding dirhmun bantuk a phanh caah SAC ralkap lei zong nih tualchung mi cu thilri nan thiar khawh chung in thiar u, tiah an fial hna. Khuapi chung i a taang mi cheukhat zong SAC ralkap nih siizung ah an chekhlat hna i Byuha sakhan ah an kalpi hna, tiah tualchung mi nih an chim.
Vanlawng Ral Ṭih Ruang Ah Tonzaang Khua Mi Thong Hra Leng Khua An Hlam Ngam Rih Lo>>>>>>>>
Chinram, Tonzaang khuapi cu CNA le Chin hriamtlai ṭangṭi phu nih an laak khawh cang nain tualchung mi thong hra leng cu SAC vanral ṭih ruang ah inn an hlam ngam rih lo, tiah theih a si.
Tonzaang khuapi cu a luancia May 23 ni ah CNA ṭangṭi phu nih an rak laak i hriamnam 50 leng le tangka Kyats sing 3,000 hrawng zong an rak laak. Cu kahdohnak ruang ah cun tualchung mi thong hra leng cu Kalaymyo, India–Myanmar ramri le a him deuhnak khuate lei ah an zaam hna. Khua a hlam cang mi zong an um nain tam deuh cu vanlawng ral ṭih ruang ah an tlung ngam rih lo, tiah tualchung mi pakhat nih a chim.
“SAC ralkap vanlawng ṭih ruang deuh ah an kir ngam rih lonak a si, tlunnak lampi Tedim zong ah atu lio cu kahdohnak a chuah ve caah a har ngai ko, kan dirhmun hi a fian rih lo caah tam deuh cu an tlung ngam rih hna lo, atu i a kir cang mi cu mi tlawmte an si, cu hmanh cu inn va zoh ta duak bantuk khi a si,” tiah tualchung mi pakhat nih a chim.
Chinram chung ah Tonzaang khuapi telh in Cikha, Rihkhawdar, Surkhua, Rezua, Lailenpi, Makuiingnu, Hnaring, Webulah le Kyindwe tiin khuapi 10 cu Chin hriamtlai phu nih an laak cang i Paletwa khuapi le Sami khuapi tu cu Rakhine ralkap AA nih an uk ve.
United Nations Office for the Coordination of Humanitarian Affairs (UNOCHA) nih an khawmh mi cazin an langhter ning ah SAC ralkap nih hramhram in nawlngeihnak an laak ni thawk in Myanmar ram hmun kip ah innlo chuahtak in a zaam mi nuai 2.7 leng an phan cang.
Leave a Reply