Mon ram, Ye peng ah hram a bunh mi LIB 106 in Battalion Commander rian a tlai mi Major Than Naing Soe cu hriam he an tlaih tiah Dawna Column 2 nih an thanh.
Thil cawk ah a rak chuak mi Major Than Naing Soe cu thawngpang an theih ning in an rak bawh June 5 zaanlei sml 6:00pm hrawng ah Mawkanin khua pawng ah MA-5 pistol zuun 1, MA-3 zuun 1, mawṭaw pakhat he an tlaib hi a si.
Major Than Naing Soe hi LIB 106 ah Company Commander a si ko nain atu lio hi Battalion Commander rian a tlaih lio a si tiah theih a si.
Sakhaan Lak Kahdohnak Thawngpang Ruang Ah Matupi le Mindat Khuami A Zaam Mi An Karh
Chin ramkulh, Matupi le Mindat khuapi pawl ah sakhaan lak kahdohnak a chuak cang lai tiah thawngpang a len caah khuami a zaam mi a za in an karh tiah ralzaam bawmhnak phu nih Khonumthung Burmese ah an chim.>>>>>>>>>>>>>>
Matupi khuachung ah sakhaan lak kahdohnak a chuak cang lai ti mi thawngpang ruang ah khuachung mipi hna cu a luancia zarhkhat hrawng thawk in an zaam cang hna i atu ahhin a ruun in an karh chin tiah Matupi peng ralzaam bawmhnak phu ṭuanvo ngeitu nih Khonumthung Burmese ah a chim.
“Minung zeizah dah an zaam ti cu a fiang in kan thei rih lo, khuapi chung minung hi cu an tam ko, nikhat hnu nikhat in an ra thluahmah, an zapi tein kan pehtlai kho rih hna lo, pehtlaihnak a tlamtling lo, cycle lei chanbaunak zong a um, atulio cu data kan lak ter mi hna zong a tlamtling lo” tiah Matupi peng IDP phu ṭuanvo ngeitu nih Khonumthung Burmese ah a chim.
Matupi khuachung mipi pawl hi hramhram in uknak lak a si hnu kum 3 chung ah a phunphun in innlo an zaamtak hna caah a zaam mi cazin hi an la kho rih lo tiah theih a si.
India lei ah a zaam mi an um bantuk in Magway ramṭhen, Gangaw, Saw lei zong ah a zaam mi an um, Yangon, Mandalay lei zong ah a zaam mi cheukhat an um hna i a cheu cu Matupi peng khuate lei ah an zaam hna tiah theih a si.
Magway ramṭhen, Saw peng chung ah Matupi peng ralzaam 50 leng an um tiah Saw peng ralzaam bawmtu pakhat nih a chim ve.
Cubantuk in Mindat khuachung mipi ralzaam 300 leng zong Saw peng ah an zaam hna i nifatin in ralzaam an ra tiah Saw-Kyaukhtu ralzaam bawmtu pakhat nih a chim.
Mindat khuachung in ralzaam 500 hrawng zong an rak phanh chap caah umnak kan tawlrel piak hna tiah ralzaam bawmtu nih cun a chim.
“Mindat hi cu an tam ngaingai cang. Cheukhat cu ka hin an i din lai. Khuapi lei ah an kal lai. Cheukhat hi Saw peng ah inn an hlang. Cheukhat hi ralzaam camp pawl ah an um hna. Yaw lei kan theihhngalh mi pawl zong an rak phan. Cheukhat cu innlo zong an sak cuahmah lio a si” tiah a chim.
Mawṭawl, cycle, tricycle pawl tiah a phunphun in an rak phan hna i cheukhat cu Saw peng chung ah inn an hlang, ralzaam sakhaan hna an sa i an um hna tiah theih a si.
Cheukhat hi Mandalay, Yangon, Pakokku lei an chungkhat sin ah an zaam hna.
“CDF pawl nih khuapi lak kahdohnak an thawk cang lai. Zaam uh tiah an chim. Cucaah ahlan kan in an zaam cia hna tiah ralzaam pawl nih an chim” tiah Saw peng ah kum 2 leng ral a zaam cang mi pakhat nih Khonumthung Burmese ah a chim.
Saw peng ah a zaam mi chung ahhin nu le hngakchia pawl an tam bik tiah an chim fawn.
Ralzaam pawl hi fur caan a phanh cang lai caah ruah khamnak tampi an herh, nifatin eidin le sii pawl zong an herh tuk tiah theih a si.
Tonzang le Cikha khua cu CNA hruainak in dothlennak phu pawl nih an lak khawh cang i Tedim khua zong Chin Brotherhood phu chungtel a si mi PDF-Zoland le CNDF nih an kah cuahmah lio a si.
Chinland cozah, Ministry of Defense kuttang hriamtlai phu 14 nih May thla dongh lei ah an tuah mi Meeting zong ah Chin ramkulh chung ah SAC ralkap an thiannak hnga a biapi mi hmunhma pawl kha papek in lak ding kong biaruahnak zong an ngei.
Hramhram in uknak lak a si hnu kum 3 leng caan chung ah Chin ramkulh mipi a cheu leng, sing 2 le cheu leng nih innlo an zaamtak tiah CHRO zong nih a langhter.
Leave a Reply