ZFU/PDF Zoland nih tuah mi a voi 14 nak Basic Military Training tlamtling tein an dih kong ZFU/PDF Zoland nih nihin June 7 ah an thanh.
A luancia June 1 ni ah ZFU/PDF Zoland nih an tuah mi Basic Military Training cu tlamtling tein an lim i ralkap thar nu 15 le pa 66, an zate ah minung 81 nih ṭha tein training an lim kong, ZFU/PDF Zoland nih cun an thanh.
“ZFU/PDF Zoland hmunram chung ah tuah mi Basic Military Training tuahnak ca ah a lam kip in a kan bawmtu le kut a samhtu pumpak cio nan cung ah kan i lawm tuk hringhran,” tiah ZFU/PDF Zoland nih bawmchantu sinah an i lawmhnak an langhter.
Matupi Khuapi Chung Um A Tam Deuh Cu Innlo Chuahtak In An Zaam Hna>>>>>
Chinram, Matupi khuapi um tualchung mi 3,000 leng cu innlo chuahtak in an zaam hna i SAC ralkap nih khuapi chung chawdawr an boh hna i an duh mi thil paoh an laak, tiah theih a si.
Chinland Defense Force – Matupi, Brigade 1 le Brigade 2 nih a luancia May 20 in June 5 tiang caan an pek hna i khuapi um tualchung mi cu zaam ding in ralrin an pek hna hnu ah minung 3,000 leng khuapi chuahtak in an zaam, tiah theih a si.
Matupi khuapi in a zaam mi tualchung mi cheukhat cu a kiangkap khuate ah an zaam i a cheu cu India ram, Mizoram ramkulh ah motor le motorcycle i hlan in an zaam hna, tiah theih a si.
“Khuapi chung ah minung an tlawm ngai cang i SAC ralkap lei zong nih zaam ding in an fial hna. Kanmah kan um lio ah cun dawr ngan deuh mi ah a um mi paoh an laak i sakhan ah an i kalpi,” tiah ralzaam pakhat nih a chim.
Khah-Lah-Yah 304 le Khah-Lah-Yah 140 Byuha sakhan kar ah a um mi Matupi khuapi cu a kaang ve ding dirhmun bantuk a phanh caah SAC ralkap lei zong nih tualchung mi cu thilri nan thiar khawh chung in thiar u, tiah an fial hna. Khuapi chung i a taang mi cheukhat zong SAC ralkap nih siizung ah an chekhlat hna i Byuha sakhan ah an kalpi hna, tiah tualchung mi nih an chim.
Leave a Reply