Bago ramṭhen, Okpho peng bomb puahnak ah SAC ralkap pathum an thih hnu ah tualchung mi tam ngai tlaih an tong i Ko Kala ti mi pa pakhat cu SAC ralkap nih a mit pahnih ning in an khoih i an hrem kong, Thayarwaddy pengkomh PDF in ṭuanvo ngei pakhat nih a chim.
A luancia June 4, zinglei suimilam 10:00 hrawng ah Okpho peng, Waing khua palik sakhan ah zuu ding in a chuak mi SAC ralkap 5 cu Thayawaddy pengkomh Battalion 3802, company 4 nih lampi hmun khat ah TNT bomb lung 3 in an puahhnawh hna i minung pathum an thi, pahnih an hliam a fak ngai, tiah theih a si. Bomb puahhnawh in SAC ralkap pathum an thih hnu ah palik sakhan pawng ah a um mi tualchung mi 17 cu SAC ralkap nih an tlaih hna i minung 12 cu thlah ṭhan an si nain Ko Kala Lay, Ko Zaw U, Ma Aye Moe, Ma Yin Aye le a dang pakhat cu nihin tiang an thlah rih hna lo, hren rih mi minung 5 lak ah palik sakhan pawng ah Mohinga a zuar mi Ko Kala Lay cu SAC ralkap nih a mit pahnih ning in an khoih i cikcin khih in an hrem, tiah theih a si.
“Palik sakhan pawng ah Mohinga zuar mi Ko Kala Lay cu PDF nih bomb an tarh lio ah “na hmu hna lo maw” tiin a mit orhlei an khoihpiak, cun “ralkap ti hngalh ko bu in Mohinga kheng khat ah Kyats 1,000 in na hei zuarh hna” tiin a mit kehlei an khoih ṭhan, atu cu Waing palik sakhan ah an hren,” tiah Thayarwaddy pengkomh PDF in ṭuanvo ngei pakhat nih a chim.
CDF–KKG Battalion 5 Nih A Voi Thumnak Basic Military Training Tlamtling Tein An Lim>>>>>
Chinland Defense Force – Kalay Kabaw Gangaw Battalion 5 nih a voi thumnak Basic Military Training cu a luancia ni tlawmpal chung ah tlamtling tein an lim kong nihin June 8 ah CDF–KKG nih an thanh.
A voi thumnak CDF-KKG Battalion 5 training lim lawmhnak ah cun Chinland Defense Force – Kalay Kabaw Gangaw in ṭuanvo ngeitu hna le khuallian sawm mi hna an i tel kho. Cu lawmhnak ah cun zohchunh tlak laksawng, kut ding bik mi laksawng le aa zuam bik mi laksawng tiin thiamhlei laksawng peknak an ngeih kong, CDF-KKG nih an langhter.
Leave a Reply