Kalaymyo, Majesty Hotel Ah Mino 20 Leng An Tlaih Hna>>>>>>>>>>>>

Sagaing ramṭhen, Kalaymyo, Majesty hotel ah mino 20 leng cu SAC ralkap nih an tlaih hna tiah khuami hna chim mi cherhchan in Mizzima nih a langhter.
Kalaymyo, Thazin sang ah a um mi Majesty hotel ah June 9 chun sml 2:00pm hrawng ah an tlaih hna hi a si tiah a langhter.
“Hotel hi a hlan ahcun KTV an tuah, Hotel a hnu ah ti lionak a um. Zarhpi ni hin cun a raa mi an tam. Ti aa lio mi hngakchia pawl an tlaih hna i ke 6 ngei mawṭaw in an kalpi hna” tiah Kalay khuami nih Mizzima ah an chim.

Kum 18-20 hrawng mino pawl cu a khuh um lomi mawṭaw cung ah palek pawl nih an ṭhut ter hna i an kalpi hna tiah an ṭial.
Atu bantuk in mino an tlaih hna i ralkap tlak ding ca a si kho men i Kalaymyo ah a voikhatnak a bu in an tlaih hna zong a si tiah an chim.
An tlaih mi hna hi Kalaymyo ROC chung ah an kalpi hna tiah theih a si.

Kalaymyo vanlawng tual, June 9 zinglei ah SAC vanlawng Y8 pakhat a ṭum i mawṭaw ngan 4 tlum ralkap pawl a phorh hna tiah khuami nih Mizzima ah an chim fawn.
Cu ralkap pawl cu vanlawng tual chaklei Sakhaan Gyi khua pawng raltuk cawnnak No. 10 ah ab kalpi hna tiah theih a si.

Chin Ramkulh Kahdohnak Ruang Ah Sianginn Sianginn 1,500 Leng An Khar>>>>>>

Chin ramkulh chung kahdohnak pawl ruang ah sianginn 1,500 leng an khar tiah pengkulh fimcawnnak zung cazin ning in theih a si.
Chin ramkulh chung ah sianginn 1,551 a um. 2024-2025 cacawn kum ah sianginn 38 lawng an awn khawh. Cucaah sianginn 1,513 cu khar a si.
Hakha khuapi ah sianginn paruk, Falam ah sianginn pahra, Mindat ah sianginn pali, Matupi peng ah sianginn 15, Tedim peng, Khaikam khua ah sianginn 3 hna lawng awn khawh a si tiah an chim.

“Tukum cu sianginn awn khawhnak pawl a tlawm i sianginn aa ap mi zong an tlawm. Ahlan cu Tonzang le Tedim khua ah kan awn khawh. Tukum cu kan awng kho ti lo” tiah pengkulh zung in ṭuanvo ngeitu pakhat nih RFA ah a chim.

2023-2024 cacawn kum ahcun Thantlang peng dah ti lo, Chin ramkulh peng 8 ah sianginn 328 an awn khawh i sianginn a kai mi 35,434 an um tiah a chim.
Chin ramkulh zong ah hramhram in uknak lak a si hnu ah SAC ralkap le Chin hriamtlai phu hna karlak ah kahdohnak a chuak lengmang.
Atutiang ah Tonzang, Cikha, Rihkhawdar, Surkhua, Rezua, Lailenpi, Makui Ein Nu, Hnaring, Waibula, Cindwe khua hna cu Chin dothlennak phu pawl nih an lak khawh cang.