Mindat khuachung ah hmunhma a khuar mi SAC ralkap nih Mindat khuachung mino 4 cu June 8 ah a ruang um lo in an tlaih hna tiah theih a si.
Cu kong pehtlai in Mindat khuami pakhat nih “Mino 4 an tlaih hna tiah kan theih. A ho an si cu an thei rih hna lo. Moe Pyi Taung Car Gate ṭuanvo ngeitu zong aa tel” tiah Zalen Media ah a chim.
Atulio Mindat khua ah Helicopter in Brigade 77 thazang, hriam, kuan pawl a chap hna tiah theih a si. LIB 274 zong nih khuate lei ah hriamngan a kah tiah theih a si.
Mi an um lonak inn pawl zong ah ralkap, palek pawl nih hmunhma an lak i sizung luhchuahnak zong an rengh tiah theih a si.
Maungdaw Um SAC Kuttang BGF Tilawng A Pil, Nu le Hngakchia An Tlau>>>>>>>>>>>
Rakhine ram chaklei, Maungdaw peng um SAC kuttang BGF sakhaan pahnih in palek le an chungkhar pawl a phortu tilawng cu SAC ralkap nih an kah caah nu pahnih le hngakchia pahnih an tlau tiah SAC kuttang BGF pakhat nih muicawl pakhat cu Social cung ah a langhter.
Nah-khah-khah 4 le 9 in a zaam mi SAC chungtel pawl cu tilawng in an phorh hna i Kanthu tilawng ngan cung ah khinh hna ding an si tiah Commander In Chief nih nawl a pek hna ning in tilawng hme in an kal hi a si tiah Myanmar Now nih a langhter.
Asinain an chungkhar pawl, hngakchia pawl, aa hliam mi pawl cu tilawng ngan cung khinh ding in an naih hna lio ah tilawng ngan nih a naih duh hna lo leng a meithal in an kah hna, tilawng an mer i an kit lei ah ti a lian i an tilawng a pil, ti a tla mi chung ah hngakchia an i tel tiah muicawl chung ahcun an chim.
“A tang mi palek pawl, kan nupi le pawl, kan fale pawl, aa hliam mi pawl kan va kuat hna lio ah an kan kaiter duh lo i meithal in an rak kan kah, an kir lei ah ti a lian i an tilawng a pil. Palek nupi le pahnih an hmu hna lo, hngakchia pahnih zong” tiah an chim kha muicawl chung ah hmuh khawh a si.
Commander In Chef sin in zaam/hnu kirnak nawl an ngah hnu ah an kal mi a si ko nain an rak kah hna hi a si tiah a chim fawn.
“A tang mi palek pawl kan kir lio ah tilawng ngan in an in don hna lai tiah byuha nih an kan pehtlaih piak, Mawrawaddy byuha nih. An kan pehtlaih piak caah Commander In Chef sin nawl kan hmuh hnu ah kan kir hi a si” tiah a chim.
June 9 ah Social cung ah a rak lang mi muicawl ah tilawng aa lehnak, an tapnak hmun pawl bel hi an langhter lo.
Cu muicawl cu AA chimphuannak nawl a ngeitu Khine Thukha nih June 10 ah a Telegraph Channel ah a tar ve ṭhan.
“SAC cu a rawk cang, ralkap pawl anmah le anmah karlak ah dawtnak/zawnruahnak a um ti lo, an hruaitu pawl nih hruaitu dirhmun an tlinh lo, anmah himnak ca lawng ah an zaam kha fiang tein kan hmuh khawh nak muicawl a si” tiah Khine Thuka nih a ṭial.
No. 6 BGF Company cu June 6 zinglei ah le Minhluat peng hrambunh No. 9 BGF Company cu June 7 chun ah kan lak cang tiah AA nih June 7 ah thawng a thanh.
June thla zarhkhatnak chung, Maungdaw peng kahdohnak ah SAC chungtel 400 leng an thi i kahdohnak chung in a zaam mi cheukhat cu ti ah a tla mi zong an um tiah AA nih an thanh.
A Zaam Mi SAC Ralkap 134 le Bangladesh Rammi 45 An I Thleng>>>>>>>>>>>>
Myanmar ram lei ah AA le SAC ralkap karlak kahdohnak ruang ah Bangladesh ram ah a zaam mi SAC ralkap 134 cu Bangladesh nih June 9 ah an rak kuat hna tiah Bangladesh hrambunh thawngzamh pakhat nih a langhter.
Cun SAC zong nih Myanmar ram ah thong a thlak mi Bangladesh rammi 45 a kuat ve hna lai.
June 9 zinglei ah Bangladesh nih a kuat mi SAC ralkap pawl hi a luancia April 25 le May 5 ah ramri lonh in a zaam mi an si.
Myanmar ram lei palai pakhat cu Zarhte ni zinglei ah Kawbazar a phan i a zohfelmak an tuah hnu ah an fehter tiah an langhter.
SAC tilawng nih Chindwin tiva ah a hngah hna i SAC ralkap pawl cu Kawbazar um Bangladesh ramchung ti lei umkalnak BIWTA nih Chindwin ah a va kuat hna lai.
Myanmar lei nih a kuat ding Bangladesh rammi 45 zong SAC tilawng cung in an hngah ve. Bangladesh rammi hna hi a ruang a phunphun ruangah tlaihmi an si hna i a phunphun in thong saupi tla ding an si tiah Bangladesh lei thawngzamh nih a langhter.
SAC nih a luancia April 25 zong ah Myanmar ramchung ah thongthlak mi Bangladesh rammi 173 cu Bangladesh ah a rak kuat ve hna. Nikhat chung ah Bangladesh zong nih Myanmar lei kahdohnak pawl ruangah Bangladesh ramchung ah a zaam mi SAC chungtel 288 cu Myanmar lei ah a kuat hna.
Bangladesh nih tukum February 15 zong ah SAC ralkap, BGF le Lah-Wah-Kah zung rianṭuantu 330 cu Myanmar lei a kuat hna.
Leave a Reply